Soltústik Qazaqstan oblysynda oqý-jattyǵý barysynda tikushaqtyń qozǵaltqyshy ózdiginen isten shyqty. Áýe kemesiniń bortynda eki adam bolǵan, dep habarlaidy "Ult aqparat".
«2021 jyly 6 qańtarda Petropavl qalasy áýejaiy aýdanynda oqý-jattyǵý kezinde aviatsiialyq oqiǵa tirkeldi. «Aeroprakt» JShS-ǵa tiesili BO-105 tirkeý nómiri UP-ES114 tikushaǵynyń oń jaq qozǵaltqyshy isten shyqty», - delingen QR Indýstriia jáne infraqurylymdyq damý ministrliginiń aqparatynda.
«Aeroprakt» JShS basshylyǵynan alynǵan aldyn ala málimetter boiynsha, tómendegi mán-jai anyqtalǵan.
«VO-105 UP-ES114 áýe kemesiniń ekipajy ushý tapsyrmasyn bekitilgen josparǵa sáikes oryndady. Belgilengen biiktik 300 fýtqa jetken kezde Petropavl qalasynyń áýejaiynan 20 shaqyrym qashyqtyqta tikushaqtyń oń qozǵaltqyshy ózdiginen isten shyqqan. Áýe kemesiniń komandiri Petropavl qalasy áýejaiynyń áýeden tańdalǵan alańyna májbúrli túrde qoný sheshimin qabyldady. Májbúrli qoný aldynda ekipaj «Qazaeronavigatsiia» RMK ÁQQ dispetcherine qozǵaltqyshtyń isten shyqqanyn baiandady», - dedi ministrliktiń baspasóz qyzmetinen.
Tikushaq saǵat 13:38-de jerge sátti qonǵan. Zardap shekkender joq. Aviatsiialyq oqiǵa kezinde áýe kemesiniń bortynda ushqysh-nusqaýshy jáne áýe kemesiniń komandiri bolǵan. Al QR IIDM aviatsiialyq oqiǵalar men intsidentterdi tekserý basqarmasynyń qyzmetkerleri oqiǵany tekserýge kiristi.
