Foto: pixabay.com
Soltústik Qazaqstan oblysynda jastardyń baspana máselesin sheshý maqsatynda jeńildetilgen ipotekalyq baǵdarlama iske qosylmaq. Qajetti qarajat bólindi, dep habarlaidy "Ult aqparat".
SQO ákimi Ǵaýez Nurmuhambetov Petropavlda óńir turǵyndarymen kezdesip, júzege asatyn jobalarmen tanystyrdy.
«Baspana alý – ózekti máselelerdiń biri. Petropavlda biyl «Qyzyljar jastary» jeńildetilgen ipotekasyn iske qosamyz. Oǵan densaýlyq saqtaý, veterinariia, mádeniet, sport, áleýmettik qorǵaý, azamattyq qorǵanys jáne energetikada qyzmet etetin jas otbasylar qatysady. Jobaǵa suranys bar, adamdar kútýde, qarjy qarastyrylǵan», - dedi jaqsy jańalyqpen bólisken oblys ákimi.
Petropavl qalasyn damytý maqsatynda birneshe joba qolǵa alynbaq. Máselen, oblys ortalyǵynda qazirgi ýaqytta 600-ge jýyq aýla bar, onyń jartysyn jańartý qajet. Óńir basshysynyń aitýynsha, biyl 60 aýla jóndelmek. 5 jylda barlyǵy 260 aýla qamtylady. Sondai-aq qalada 7 avtoturaq pen 20 jylytylǵan aialdama ornatylady.
«Biznestiń áleýmettik jaýapkershiligi aiasynda qoǵamdyq ataýly saiabaqtar qurylady. Bul bastamany kásipkerlerimiz qoldap, qarjylandyrýǵa kelisti. Olardyń ishinde: Gennadii Zenchenko, Dmitrii Sharapaev syndy biznesmender, «Sevkazenergo», «Qyzyljar sý» jáne «Alageum Electric» kásiporyndary bar. Joldardy jaqsartý boiynsha keshendi jumystar jalǵasady. Oblys ortalyǵyndaǵy kóshelerdiń barlyǵyna asfalt tóselmegeni jasyryn emes. Biz biyl qalanyń shetine basymdyq beremiz. Petropavl ákimine 5 jylda qiyrshyq tas tóselgen joldardy asfaltqa aýystyrýdy tapsyrdym. Biyl qalanyń 44 kóshesi jóndelmek, onyń ishinde 39 kóshede buryn asfalt bolmaǵan», - dedi Ǵaýez Nurmuhambetov.
Oblys ortalyǵyndaǵy ózekti máseleniń biri – qoǵamdyq kóliktiń jaǵdaiy. Petropavlda qazir 115 jańa avtobýs júr. Eski avtobýstar júretin marshrýttar da bar. Jyldyń ortasynda tasymaldaýshylar 30 jańa avtobýs satyp almaq.
Kezdesýde turǵyndar ózge de máseleni kóterip, suraqtaryna jaýap aldy. Oblys ákimi qoiylǵan suraqtardyń barlyǵyn baqylaýǵa almaq.
