Soltústik Qazaqstan oblysynda bir táýlikte 235 adamǵa koronavirýsqa qarsy vaktsina egildi, dep habarlaidy "Ult aqparat".
SQO densaýlyq saqtaý basqarmasynyń málimetinshe, óńirde bir táýlikte 235 adamǵa koronavirýsqa qarsy vaktsina egildi. Ár ekpe egý pýnktinde bir kúnde orta eseppen 40-50 adam vaktsina alyp jatyr. Naýqandy sáti aiaqtaý úshin Petropavlda qosymsha taǵy eki ekpe egetin oryn ashyldy.
«Vaktsina egý pýnktteri qazir 13 aýdan ortalyǵynda jáne 6-ýy Petropavlda jumys istep jatyr. Onyń ekeýi keshe tústen keiin ashyldy. Bireýi ftiziopýlmonologiia ortalyǵynda, ekinshisi oblystyq kópbeiindi aýrýhanada ornalasqan», - deidi SQO densaýlyq saqtaý basqarmasynyń baspasóz hatshysy Gúlnar Sailaýqyzy.
Birinshi kezekte vaktsinany koronavirýs infektsiiasyn juqtyrǵandarmen tikelei jumys isteitin meditsina qyzmetkerleri alyp jatyr.
«Óte jaqsy uiymdastyrylǵan. Meni aldymen terapevt qarap, jaǵdaiymdy tekserdi, suraqtaryn qoidy. Tek soan keiin ǵana egilýge ruqsatyn berdi. Keshe áriptesterim aldy. Olardyń keibirinde azdap dene qyzýy kóterildi. Sondai-aq ine pisken jer qyzaryp, qyshýy múmkin. Bul adam aǵzasynyń ekpege qalypty reaktsiiasy. Vaktsina egilgenderge qoldaryna jadynama berilip jatyr. Onda barlyǵy aitylǵan, sondai-aq dárigerdiń telefon nómiri kórsetilgen», - deidi 3-qalalyq emhanaǵa vaktsina alýǵa kelgen Petropavl qalalyq kópbeiindi aýrýhana bas dárigeriniń orynbasary Rýslan Tasov.
Dárigerdiń aitýynsha, óńirde KVI boiynsha jaǵdai kúrdeli. Sondai-aq ol eńbek etetin qalalyq kópbeiindi aýrýhanada infektsiialyq statsionar ornalasqan.
«Vaktsina alǵannan keiin adamda immýnitet paida bolady. Ol virýsty juqtyrsa da aýrý jeńil ótedi. Biz únemi syrqattarmen bailanystamyz. Qorǵanǵanymyzben juqtyryp alýymyz ábden múmkin. Búgin bizdiń aýrýhanadan 50 adam keldik. Olardyń barlyǵy infektsiialyq statsionarda eńbek etetinder», - deidi Rýslan Tasov.
