Soltústik Qazaqstan oblysynda koronavirýs infektsiiasyn juqtyrǵan ekinshi adam – 40 jastaǵy áiel, dep habarlaidy "Ult aqparat".
SQO densaýlyq saqtaý basqarmasynyń basshysy Timýr Sultanǵazievtiń aitýynsha, qaýipti indetti juqtyrǵan áiel Taiynsha aýdany Kellerovka eldi mekeniniń turǵyny. 1980 jyly týǵan áiel oblys aýmaǵynan eshqaida shyqpaǵan. Dárigerler ony juqtyrýy múmkin dep teksergen eken.
Onyń syrqat ekeni keshe keshke anyqtalyp, birden Petropavldaǵy juqpaly aýrýlar aýrýhanasyna, jeke bokske jatqyzyldy. Qazirgi tańda onyń densaýlyǵyna shaǵymy joq. Dene qyzýy jáne jaǵdaiy birqalypty.
Mamandardyń aitýynsha, Kellerovka eldi mekeni kesheden beri karantinde. Al juqpaly aýrýdy juqtyrǵan áielmen bailanysta bolǵandardyń barlyǵy anyqtalyp, saraptama alyndy. Olardyń bári búginde karantinde jatyr.
Bul – SQO-da tabylyp otyrǵan ekinshi jaǵdai. Buǵan deiin aýyrǵan kelinshektiń qan saraptamasy qaita tekseristen ótkizilýi úshin Almatyǵa jiberilgen edi. SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Serikbai Qasmaqasovtyń aitýynsha, ol saraptama Almatyǵa deiin eki kún júrip barǵan. Sol sebepti qan quramy ózgerip, durys nátije bermeýi múmkin. Sol sebepti syrqat dep tanylǵan kelinshekti karantinnen shyǵarmas buryn taǵy da teksermek. Saraptama karantinniń 13-shi kúni jasalynady.
SQO densaýlyq saqtaý basqarmasynyń málimetinshe, qazirgi tańda úi karantininde 494 adam, provizorlyq statsionarda – 44, al karantindik statsionarda 30 adam jatyr.
