Soltústik Qazaqstan oblysynda aýyl turǵyny túnde kóligin ashyq qaldyramyn dep mashinasynan aiyryldy, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, oqiǵa shilde aiynyń basynda Ǵ.Músirepov atyndaǵy aýdanda bolǵan. Toqsan bi aýylynyń turǵyny «VAZ 21099» avtokóligin túngige esik aldynda ashyq qaldyryp, tańerteń ornynan tappaǵan. Er adam birden politseilerdiń kómegine júgingen.
Jedel-izdestirý is-sharalary barysynda osy oqiǵaǵa qatysy bolýy múmkin basqa aýyldyń buryn sottalǵan 21 jastaǵy turǵyny anyqtaldy. Sózine qaraǵanda, ol Toqsan bi aýylynda qonaqta bolǵan. Túnde úiine qaityp bara jatqanda aýlalardyń birinde ot aldyrý kilti bar esigi ashyq turǵan kólikti kórip, minip ketedi. Biraz júrgennen keiin benzini taýsylǵan mashinany joldyń shetine shyǵaryp, órtep jibergen. Úiine jetkende, ony aýdandyq politsiia bóliminiń jedel ýákilderi qarsy aldy.
«Atalǵan fakti Sotqa deiingi tergep-tekserýdiń biryńǵai tizilimine «Avtomobildi nemese ózge de kólik quralyn jymqyrý maqsatynsyz quqyqqa syiymsyz ielenip alý» boiynsha engizildi. Is materialdaryn sotqa jiberýge ázirlep jatyrmyz. Jyl basynan aýdanda kólikti quqyqqa syiymsyz ielenýdiń 3 faktisi tirkelip, barlyǵy ashyldy», - deidi aýdandyq politsiia bólimi bastyǵynyń mindetin atqarýshy Rýslan Birjanov.
