Soltústik Qazaqstan oblysynda koronavirýs infektsiiasyn juqtyrǵandar sany azaiyp keledi, óńir «qyzyl aimaqtan» shyqty, dep habarlaidy "Ult aqparat".
SQO sanitariialyq-epidemiologiialyq baqylaý departamentiniń málimetinshe, ótken táýlikte oblysta 62 adam qaýipti virýsty juqtyrsa, 69-y táýir boldy. KVI juqtyrǵandar sany kúnnen kúnge azaiyp keledi. Eldegi epidemiologiialyq jaǵdaidy baǵalaityn matritsa boiynsha óńir «qyzyl aimaqtan» shyqty.
Oblys ákimi Qumar Aqsaqalov ta jaǵdaidy baqylaýda ustap otyr. Óńir basshysy qala ákiminiń eseptik kezdesýinde epidemiologiialyq jaǵdai osylaisha jalǵasatyn bolsa karantindik shekteýlerdiń jeńildetiletinin aitty.
«Bul – der kezinde qolǵa alynǵan shekteý sharalarynyń nátijesi. Sondai-aq turǵyndardyń tártibiniń arqasy. Eger jaǵdai osylaisha jalǵasatyn bolsa, jaqyn arada shekteýlerdi jeńildetemiz. Ázirge naqty ýaqytyn aitý múmkin emes. Alaida jaqynda kei nysandardyń demalys kúnderi jumys isteýine ruqsat berý máselesi qaralady», - dedi Qumar Aqsaqalov.
Qazir Petropavlda demalys kúnderi kóptegen nysandar jabyq. Sondai-aq senbi-jeksenbi qoǵamdyq kólik júrmeidi.
Jalpy SQO-da COVID-19 juqtyrǵandardyń sany 11 305 adamǵa jetti, 10 696 adam saýyqty. Qaýipti virýs juqtyrǵan 42 adam qaitys boldy.
