Zarechnyi aýylynda kezdeisoq ótip bara jatqan adam jartylai qańqaǵa ainalyp bara jatqan múrdeni baiqaǵan, dep habarlaidy QazAqparat.
Soltústik Qazaqstan oblystyq Politsiia departamenti baspasóz qyzmetiniń málimetinshe, sot-meditsinalyq saraptama qylmystyq belginiń bar ekenin kórsetti. Adam óltirilgeli beri birneshe ai ótken, onyń saýsaqtarynyń izin alý múmkin emes.
Aǵa kriminalist Jaqsylyq Ýaliev arnaiy óńdeýden keiin alaqannyń bir bóligin sýretke túsirdi. Sýret daktiloskopiialyq «Papilon» derekqory arqyly tekserildi. Marqum turǵylyqty mekenjaiy joq, 36 jastaǵy petropavldyq ekeni anyqtaldy.
«Eki táýlik boiy jedel qyzmetkerler, ýchaskelik inspektorlar qylmysty ashýǵa tyrysty. Marqumnyń ólimine qatysy bolýy múmkin ainalasyndaǵy adamdardy tekserý kezinde taǵy bir jait ashyldy. Qaza tapqan er adammen birge júretin áiel de joǵalyp ketken. Jedel izdestirý sharalarynyń nátijesinde eki adamnyń ólimine kúdikti 35 jastaǵy er adam qolǵa tústi. Ol kórshi oblysqa qashyp ketken», delingen habarlamada.
Qylmysker áiel adamnyń denesin qaida jasyrǵanyn aitty. Belgili bolǵandai, ekinshi máiit alǵashqy qańqa tabylǵan jerge jaqyn bolǵan. Ólgen áieldiń kim ekeni alaqanynyń fotosýretin derekqor málimetterimen salystyrý arqyly anyqtaldy.
«Adam óltirý» qylmystyq baby boiynsha sotqa deiingi tergeý júrip jatyr. Kúdikti ýaqytsha tergeý izoliatoryna qamaldy.
