Soltústik Qazaqstan oblysynda jyl basynan dini zańnamany buzýdyń 23 deregi anyqtalyp, quqyq buzýshylar ákimshilik jaýapkershilikke tartyldy, dep habarlaidy "Ult aqparat".
Soltústik Qazaqstan oblysy politsiia departamenti baspasóz qyzmetiniń málimetinshe, anyqtalǵan derekterdiń basym bóligi dini mazmundaǵy materialdardy taratýmen jáne satýmen bailanysty.
Petropavldyń 56 jastaǵy turǵyny 500 myńnan astam teńge aiyppul tóledi. Áleýmettik jelilerge monitoring júrgizý barysynda er adamnyń «YouTube» jáne «VKontakte» arnalaryna dini mazmundaǵy beinematerialdar salǵany anyqtaldy. Ol biyl dál osyndai quqyq buzýshylyǵy úshin jaýapkershilikke tartylǵan. Alaida, odan sabaq almai, dini mazmundaǵy aýdiofaildardy taratýyn toqtatpaǵan.
Sondai-aq, dini kitaptardy satqany úshin jeltoqsan aiynda taǵy eki áiel ákimshilik jaýapkershilikke tartyldy. Olar ádebietterdi «OLX» saitynda saýdalaǵan. Sot olarǵa aiyppul saldy.
«Dini qyzmet jáne dini birlestikter týraly» QR 2011 jylǵy 11 qazandaǵy zańnamasynyń 9-babyna sáikes, dini ádebietterdi, basqa da dini mazmundaǵy aqparattyq materialdardy, dini maqsattaǵy zattardy ǵibadat úilerinde, dini bilim berý uiymdarynda, sondai-aq oblystardyń, respýblikalyq mańyzy bar qalalardyń, astananyń jergilikti atqarýshy organdary arnaiy belgilegen statsionarlyq úi-jailarda ǵana taratýǵa ruqsat etilgenin eske salamyz. SQO ákimdiginiń qaýlysyna sáikes, búgingi kúni SQO aýmaǵynda osyndai 15 nysan jumys isteidi», - deidi SQO PD Ekstremizmge qarsy is-qimyl basqarmasynyń bastyǵy Rýslan Jarasbaev.
