Soltústik Qazaqstan oblysynda balyq aýlaýǵa shyǵyp, habarsyz ketken turǵynnyń denesi tabyldy, dep habarlaidy "Ult aqparat".
SQO tótenshe jaǵdailar departamenti baspasóz qyzmetiniń málimetinshe, 11 qyrkúiek kúni 61 jastaǵy er adam balyq aýlaýǵa shyqqan.
Týystaryna Mamliýtka qalasynan alty shaqyrym jerdegi Okýnevo kóline baramyn dep aityp ketipti. Alaida birazdan keiin onymen bailanys úzilgen.
Er adamdy izdeýge bes qutqarýshy jumyldyryldy. Balyqshynyń denesi rezeńke qaiyqtyń astynan tabyldy.
Onyń ústinde kiim bolǵan, janynan qandai da bir jeke qutqarý quraldary tabylmady. Ólim sebebi anyqtalyp jatyr.
Jalpy shilde aiynda oblystyń sý qoimalarynda 4 er adamnyń máiiti tabyldy. Aralarynda balyqshylar da bar.
