Soltústik Qazaqstan oblysynda 11 jasar bala Esil ózenine batyp ketti, dep habarlaidy QazAqparat.
SQO tótenshe jaǵdailar departamenti basqarmasynyń bastyǵy Marat Muratov oqys oqiǵa týraly brifingide aitty.
11 jasar bala Esil aýdany Nikolaevka eldi mekeniniń mańynda Esil ózeninde sýǵa ketken. Ol balyq aýlaýǵa eresektersiz jalǵyz barǵan eken.
«Balanyń denesin eki saǵattan keiin aýyl turǵyndary taýyp, sýdan alyp shyqty. Jasóspirim sýǵa batyp ketken jerde balyq aýlaýǵa, shomylýǵa bolmaidy. Jalpy sońǵy 8 jyldyń ishinde óńirde 195 adamnyń ajaly sýdan kelse, sonyń 33-i bala. Kóp jaǵdaida olar arnaiy jaraqtandyrylmaǵan jerde, eresekterdiń baqylaýynsyz sýǵa túsken.
Biyl jaz ystyq, turǵyndar áli kúnge deiin sýǵa shomylyp jatyr. Biraq túnde aýa temperatýrasy 13-15 gradýsqa deiin tómendeidi. Sýdyń ústi jyly bolǵanymen, astynda sýyq. Al bul adamǵa qaýipti», - deidi Marat Muratov.
Biyl SQO-da sýǵa 21 adam batyp ketse, onyń altaýy bala. Osyǵan orai oblystyń sý aidyndarynda qaiǵyly jaǵdailardyń aldyn alý maqsatynda TJD mamandary turaqty túrde reidter ótkizip keledi.
«Politseiler, qutqarýshylar reidterdi jii ótkizedi. Degenmen qaiǵyly jaǵdailar tirkelip jatyr. Ótken jylmen salystyrsaq, byltyr 9 adam kóz jumdy. Onyń bireýi bala. Sondyqtan turǵyndardy jáne oblys qonaqtaryn sýda asa saq bolýǵa shaqyramyz. Balalardy qaraýsyz qaldyrýǵa bolmaidy. Ruqsat etilgen jerde ǵana shomylý kerek. Biyl sý aidyndaryna 4 myńnan astam reid ótkizdik. Oblys boiynsha 1400-den astam jerge sýǵa shomylýǵa tyiym salynady degen belgi ornatyldy», - deidi SQO TJD bastyǵynyń orynbasary Murat Qanǵojinov.
