Soltústik Qazaqstan oblysynda itti uryp óltirip, keiin soiyp jegen úsh turǵynǵa qatysty qylmystyq is qozǵaldy, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, 22 tamyz kúni Bolshaia Malyshka eldi mekeniniń turǵyny politsiiaǵa aryzdandy. Aitýynsha, úsh aýyldasy onyń itin jep qoiǵan. Ol úsheýdiń bireýine 6 myń teńge qaryz bolǵan. Sonyń óteýi retinde itin bergen. Alaida aýyldastary ol itti úi kúzetý úshin emes, jeý úshin alǵan eken.
Úsh er adam itti Esil ózeniniń jaǵasynda uryp óltirip, soiyp, otqa qaqtap jegen. Ittiń qyńsyly men ony uryp jatqanyn jaqyn mańda balyq aýlap otyrǵan 12 men 16 jastaǵy eki jasóspirim estidi. Keiin úiine ketip bara jatqan balalardyń biri úsh aýyldasynyń sary itti aǵashqa asyp qoiyp, múshelep jatqanyn kórgen.
Aýdandyq politsiia bóliminiń qyzmetkerleri 1987 jyly týǵan kúdiktini ustady. Onyń qasynda bolǵan 1986 jáne 1982 jyly týǵan eki syibailasynan jaýap alyndy. Atalǵan fakti Sotqa deiingi tergep-tekserýdiń biryńǵai tizilimine «Janýarlarǵa qatygezdik jasaý» baby boiynsha tirkeldi. Kúdiktige qatysty kelýge mindettelý túrinde bultartpaý sharasy taǵaiyndaldy.
«Oqiǵaǵa qatysy barlardyń biri ittiń etin jeýden bas tartqan. Alaida úsheýi de óz áreketterin oǵashtyq baiqamaidy. Sot olardyń pikirin ózgertedi degen senimdemiz. Janýarlarǵa qatygezdik kórsetkenderge zań boiynsha 120 AEK mólsherinde aiyppul nemese sol mólsherde túzeý jumystaryna, ne 120 saǵatqa deiingi merzimge qoǵamdyq jumystarǵa tartý, ne bolmasa 30 táýlikke deiingi merzimge qamaqqa alý jazasy qarastyrylǵan», - dedi Qyzyljar aýdany PB bastyǵy Álihan Baiqadamov.
