Soltústik Qazaqstan oblysynda áieldi aldap, onyń 600 myń teńge turatyn eki júzigin alyp ketken áiel ustaldy, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, M.Jumabaev aýdanynyń politsiia bólimine oblys ortalyǵynyń 68 jastaǵy turǵynynan aryz tústi.
Onyń aitýynsha, alaiaq ony aldap, 600 myń teńge turatyn eki altyn júzigin alyp ketken.
Jábirlenýshi áieldiń M.Jumabaev aýdanynyń ortalyǵy Býlaevta bazarda býtigi bar. Oǵan beitanys kekse áiel birneshe ret kelip, jumys ornyn alastap berýdi usynǵan.
Bastapqyda bul usynystan bas tartqanymen, keiin jábirlenýshi kelisimin bergen.
«Emshi» áiel taýyq jumyrtqasymen alastaý rásimin júrgizip, keiin barlyq pále-jala ketýi úshin qundy zat berýdi suraǵan.
Ony jeke paida tabý maqsatynda emes, órteý úshin alǵanyn aitqan.
Áiel qolyndaǵy eki altyn júzigin sheship berip, qolyna taǵy 20 myń teńge ustatypty.
Biraz ýaqyttan keiin esin jiǵan ol jaǵdaidy baǵalap, «emshige» qońyraý shalǵan. Jaýap bermegesin politsiiaǵa aryzdanýyna týra kelipti.
Maǵjan Jumabaev aýdanynyń politsiia bólimi kriminaldyq politsiia qyzmetkerleri kúdiktini ustady.
Ol jýyrda Býlaev qalasyndaǵy tanysyna kelgen Aqmola oblysynda turatyn 67 jastaǵy áiel bolyp shyqty. Saqina tárkilendi.
Atalǵan fakti «alaiaqtyq» baby boiynsha tirkeldi.
Kúdikti qolhatpen bosatyldy. Tergeý júrip jatyr.
