Soltústik Qazaqstan oblysynda 6 myń turǵyny bar 79 eldi meken kóktemgi sý tasqynynan zardap shegýi múmkin, dep habarlaidy "Ult aqparat".
SQO tótenshe jaǵdailar departamenti brifingte kóktemgi sý tasqynyna daiyndyq jaiynda aitty.
Mamandardyń aitýynsha, qaýip bar.
Kúzgi ylǵal qory kei jerlerdi normadan 42% artyq, qardyń qalyńdyǵy qalypty bolǵanymen, topyraq qazirdiń ózinde 60-150 sm aralyǵynda qatqan.
«Naýryzdyń ekinshi jartysynda qar eri bastaidy. Aqan-Burlyq, Jembaraq, Iman-Burlyq, Babyq-Burlyq» ózenderiniń sý deńgeii artpaq. Kúnniń kúrt jylýynan qar da tez erip, kólderde sý deńgeii kóteriledi. Qazirgi ýaqytta kóktemgi sý tasqynynan zardap shegýi múmkin 6 myń turǵyny bar 79 eldi meken anyqtaldy. Olardyń 30-yna sý ózenderden, 13-ine kólderden jáne qalǵany erigen qar sýy kirýi múmkin», - deidi SQO TJD bólim basshysy Sáken Aǵzamov.
Kóktemgi sý tasqynymen kúreske quqyq qorǵaý organdarynan 500-ge jýyq adam daiyn, 155 tehnika, 8 júzý quraly jáne 80-nen astam motopompa ázirlendi.
Ýshyqqan jaǵdaida jergilikti atqarýshy organ qosymsha 1900 adamdy, 1,5 myńǵa jýyq tehnikany shyǵarmaq.
Budan basqa 190 tonna janarmai, 32,4 myń tonna inertti material jáne 27,8 myń qap daiyn tur.
«2021-2023 jyldardy qamtyǵan kóktemgi sý tasqynynyń aldyn alý jáne onyń saldaryn joiýǵa arnalǵan jol kartasy bar. Onyń aiasynda 23,6 mlrd teńgege 10 is-shara júzege asýy qajet. Iaǵni sý ótetin avtojoldar, qorǵanysh dambalary, kópirler, sý ótkizý qubyrlary jóndeledi», - deidi Sáken Aǵzamov.
Munyń aldyndaǵy jumystar nátijesinde sońǵy bes jylda 160-tan astam eldi mekennen sý basý qaýpi alyndy.
Mamannyń aitýynsha, qazirgi ýaqytta aýyldardan 472 myń tekshe metr qar syrtqa shyǵaryldy.
Eldi mekenderde jergilikti atqarýshy biliktiń kóktemgi sý tasqynyna ázirligi pysyqtalyp, halyqty eskertý maqsatynda jiyndar ótkizilip jatyr.
