QR Premer-Ministriniń orynbasary Roman Skliar BekAir ushaǵynyń apatqa ushyraý sebebiniń basty nusqasyn atady, dep habarlaidy QazAqparat.
OKQ-da ótken baspasóz máslihatynda Roman Skliar eki táýlik boiy turaqta turyp qalǵan áýe kemesiniń ústine muz qatyp qalýy múmkin ekenin aityp ótti.
«Bolǵan apattyń negizgi nusqasy – áýe kemesiniń ústine muzdyń qatyp qalýy», - dedi ol.
Komissiia bolǵan apattyń birneshe nusqasyn zerttegen. Aldyn ala júrgizilgen jumystardyń nátijesinde ushaqtyń sýyq aýa raiy kezinde qoldanylatyn arnaiy suiyqtyqpen óńdelmegeni anyqtalǵan.
«Áýe kemesin muzdyń basýyna qarsy suiyqtyqpen óńdeý jumysy ishinara júrgizilgen. Áýe kemesi komandiriniń sheshimi boiynsha, tek stabilizatordy óńdeý týraly sheshim qabyldanǵan. Birinshi sanattaǵy muzdyń basýyna qarsy suiyqtyqpen ushaq qanattary da óńdelý tiis», - dedi Roman Skliar.
Eske sala ketsek, 2019 jyldyń 27 jeltoqsanynda Almatydan Nur-Sultan qalasyna ushyp shyqqan Bekeir kompaniiasynyń ushaǵy radardan joǵalyp ketti. Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy.
QR Premer-Ministri Asqar Maminniń tóraǵalyǵymen ushaq apatynyń sebepterin tergeý boiynsha Úkimettik komissiianyń otyrysy ótkizilgen edi. Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia jiberildi.
