QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev «SQ-Farmatsiia» jańa basshysyn jemqorlyq táýekelderin tolyǵymen joiýǵa shaqyrdy, dep habarlaidy QazAqparat.
«Halyq koronavirýs jaǵdaiynyń kúrdelenýiniń negizgi sebepteriniń biri - sybailas jemqorlyq, biýrokratiia jáne jaýapsyzdyq dep sanaidy. Áleýmettik jelilerdi muqiiat qadaǵalaityn adamdar munymen kelisedi dep oilaimyn. Bul - ásirese, «SQ-Farmatsiianyń» laýazymdy tulǵalaryna, meditsinalyq saqtandyrý qoryna, sondai-aq jergilikti atqarýshy organdardyń birqatar meditsina mekemelerine qatysty qylmystyq ister konteksinde ádil baǵa» dedi agenttik tóraǵasy alqa otyrysynda.
Sonymen qatar, Alik Shpekbaev «SQ-Farmatsiia» qyzmetindegi sybailas jemqorlyq táýekelderine taldaýdy syrtqy sarapshylardy keńinen tarta otyryp, jedel júrgizý qajettigin atap ótti.
«Bizdiń taldaýymyzdyń sapasy osy uiymnyń bolashaqta qanshalyqty tiimdi qyzmet etetinine bailanysty bolady. Bul shara biryńǵai distribiýtordiń jańa basshylyǵyn da kóbirek qyzyqtyrady dep oilaimyn. Sol úshin olar sybailas jemqorlyq táýekelderin joiý men ashyqtyqty qamtamasyz etý boiynsha barlyq usynystardy oryndaidy dep úmittenemin», dedi agenttik basshysy.
