«SQ-Farmatsiia» JShS basqarma tóraǵasy Berik Shárip azamattardy dárihanalardan dári-dármekti artyq satyp almaýǵa shaqyrdy, dep habarlaidy "Ult aqparat".
Onyń aitýynsha, dárini qajetti kólemnen artyq satyp alý – dárihanalarda tapshylyqty týyndatyp otyr.
«Ár óńirde ýchaskelik dáriger bar. Sol dárigerden keńes alyp, dári-dármekti tek kerekti jerde, oryndy túrde qoldaný kerek. Óitkeni dárihanalardaǵy tapshylyq – eń bastysy, keibir adamdardyń dárini artyq satyp alýynan týyndap otyr. Densaýlyq saqtaý ministrligi aldyn ala dárihanalarǵa jetkiziletin preparattardyń sanyn kórip otyr. Adamdar ambýlatoriialyq jaǵdaida emdelse de dári qory jetkilikti bolýy kerek. Biraq azamattardyń dári-dármekti baqylaýsyz kóptep satyp alýy, árine tapshylyqqa ákeldi. Óziń aýyrmasań – týǵan-týysqanyń, baýyryń aýyryp jatyr. Dári-dármekti oryndy qoldanyp-aq olarǵa kómek kórsete alar edik», - dedi Berik Shárip «Qazaq radiosy»-na bergen suhbatynda.
Eske sala ketsek, búgin Ortalyq kommýnikatsiialar qyzmetinde ótken baspasóz máslihatynda Densaýlyq saqtaý vitse-ministri Liýdmila Biýrabekova dárihanalardan keibir preparatty halyq jappai satyp alyp ketkenin habarlaǵan edi.
«Negizgisi ystyq túsiretin – paratsetamol. Jalpy bizdiń elde paratsetamoldyń 80 túri baryn atap ótkim keledi. Ol tabletka kúiinde de, sirop men svecha kúiinde de satylyp jatyr», - dedi vitse-ministr.
