Úkimettiń 28 shildedegi otyrysynda Premer-ministr Oljas Bektenov energetika jáne kommýnaldyq infraqurylymdy jańǵyrtý jumystarynyń barysyn qaraý kezinde Almaty oblysyndaǵy jobalardyń iske asý qarqynyn synǵa aldy, dep habarlaidy ult.kz.
Úkimet basshysynyń aitýynsha, óńirde birqatar jobalar boiynsha áli kúnge deiin kelisimsharttar jasalmaǵan. Osyǵan bailanysty Almaty oblysy jóndeý jumystaryna ótinim berý deńgeii tómen óńirlerdiń qataryna engen.
Óńir ákimi Marat Sultanǵazievtiń aitýynsha, oblysta jalpy quny 62,9 mlrd teńgeni quraityn 10 jobany júzege asyrý josparlanǵan. Onyń tórteýi jergilikti biýdjet esebinen qarjylandyrylsa, qalǵan jobalardy "AJK" AQ iske asyrady.
Jylýmen jabdyqtaý salasyndaǵy eki joba boiynsha merdigerler anyqtalyp, kelisimsharttar jasalǵan. Al sýmen jabdyqtaý jáne sý burý baǵytyndaǵy eki joba boiynsha konkýrs prokýratýranyń usynysymen qaita jariialanǵan. Sebebi burynǵy konkýrs nátijesiniń kúshi joiylǵan. Qaita ótkiziletin konkýrs 25 tamyzǵa deiin aiaqtalyp, jumystardy jyl sońyna deiin bitirý josparlanyp otyr.
Sonymen qatar, Marat Sultanǵazievtiń sózinshe, Qarjy ministrligi atalǵan eki jobany basymdyǵy tómen jobalar qataryna engizgen. Ákim Premer-ministrden olardy bul tizimnen shyǵarýǵa qoldaý kórsetýdi surady.
Alaida Marat Sultanǵazievtiń baiandamasyna Oljas Bektenovtiń kóńili tolmady.
«Sizdi tyńdasaq, sizden basqanyń bári kináli siiaqty. Jumysty tezdetińizder», – dedi Oljas Bektenov.
Aita keteiik, Marat Sultanǵaziev 2022 jylǵy 11 maýsymynan beri Almaty oblysynyń ákimi bolyp otyr.
