Kindik qany tamǵan jerin tárk etip, «Halifattan» jumaq izdep, jarynyń eteginen ustap ketken áielderdiń sany kóp. Solardyń biri — 53 jastaǵy Saǵida elge múgedek bolyp oraldy.
Erinen aiyrylǵan kelinshek sol bir zulmat ýaqytty kóz jasynsyz esine almaidy.
Áieldiń basynan keshken oqiǵasyn Almatydaǵy Ońaltý ortalyǵynyń mamandary jazyp alǵan.
Saǵida qan tógiske toly Siriianyń topyraǵyn birinshi ret 2013 jyly basqan.
Onyń kúieýi 1 jyl buryn barǵan.
Jat elge kele salysymen birinshi kezde bári jaqsy bolǵan. Keiin alasapyran dúnie bastaldy.
«Bizde balamyz joq edi. Ol jaqta kúieýim qarsy aldy. Jylap-eńirep, áiteýir, jettik-aý Siriiaǵa! Alǵashynda bári jaqsy boldy. Keiin Kishmadan Baǵýzǵa deiin qatty qiyndyq kórdik. Jaiaý ásker kórmedik, aýyr artilleriia boldy ol jerde. Ásirese, áýeden bombalaý qorqynyshty edi…», – deidi áiel.
Kúieýi 3 jyldan soń bombanyń astynda qalyp, kóz jumǵan.
Jalǵyz qalýdan qoryqqan Saǵida Reseidiń Áli degen qazaǵymen bas qosady. Kúrdterdiń lagerine aparar jolda ol kúieýinen adasyp qalady. Keiin bul kúieýi quqyq qorǵaý organdarynyń quryǵyna túskenin biledi.
«Kúieýim búginde túrmede otyr. Eki kúieýim de DAISh-tyń quramynda boldy. Biz kishkene qatelik jiberdik, asyǵystyq jasappyz. Ol jaqta ne bolyp jatqanyn kózimizben kórdik. Saiasat ol jaqta, munaiǵa talasyp jatyr. Túsinbei júrgen «baýyrlarǵa» asyǵystyq jasamańdar der edim. Ol jaqta basqa elderden kelgenderge jaman qaraidy. Arabtardyń tamaqtary toq, aqshasy bar. Al bizder, jan-jaqtan kelgender, ashyqtyq, aqshamyz bolmady. Men balanyń úlkenimin. Men joqta ákem qaitys bolypty. Ony osy jańa estip otyrmyn… Anam bar. Bizdi elge aldyrǵan Elbasyǵa, Prezidentke raqmet! Qansha sábidiń, áielderdiń ómirin saqtap qaldy. Óte razymyn», - dedi ol.
Áiel jat elden múgedek bop oraldy. Sýǵa shyqqanda sodyrlardyń jaýdyrǵan oǵynyń astynda qalǵan. Qańǵyǵan oq áieldiń san súiegin shaǵyp ketken. Sonyń kesirinen Saǵida qazir arbaǵa tańylǵan.
Alaida ol súiegindegi temirlerin alǵan soń jumys istep elge paidasyn tigizý nietin de jasyrmady.
«Men buryn tiginshi bolǵanmyn. Emdelip alǵan soń eshkimge salmaǵymdy salmai, jumys istegim keledi. Úkimet bizdi Siriiadan ákelýge qyraýar aqsha jumsady, óte yńǵaisyz», – dedi Saǵida.
Siriiaǵa ketken otandastarymyz búginde Elbasy Nursultan Nazarbaevtyń qoldaýymen «Jýsan» operatsiiasy arqyly elge qaityp jatyr.
Osy ýaqytqa deiin «Jýsan-1» operatsiiasynan - 47 adam, «Jýsan-2» operatsiiasynyń arqasynda - 231 adam, «Jýsan-3» operatsiiasy arqyly 300-ge jýyq adam elge qaitqan. «Jýsan-4» operatsiiasynyń arqasynda qansha adam kelgeni naqty belgisiz.
QR Bilim jáne ǵylym vitse-ministri Bibigúl Asylova habarlaǵandai, búginde 506 bala Siriiadan qaityp keldi. Qazirgi tańda elimizde jasóspirimderdi qoldaýǵa arnalǵan 15 áleýmettik-psihologiialyq, quqyqtyq ortalyq jumys istep tur. Ortalyqta táýlik boiy statsionarda 14 balaly 4 ana bar. Qalǵandary kúndizgi statsionarda. 254 bala mektepke deiingi tárbiemen qamtylǵan. Iaǵni, ol balalar mektepke deiingi uiymdarǵa baryp júr.
Mektepterde 153 bala oqyp jatyr. Sondai-aq jetim qalǵan 33 bala bar. Olar jetimderge arnalǵan uiymdarǵa taratyldy.
