Oral qalasynyń turǵyny tórt balasymen DAISh-tan qashyp kelgen. 29 jastaǵy Dina terroristik uiymnyń aýmaǵynda qalai kún keshkenin aityp berdi, - dep habarlaidy "Moi GOROD".
Aitýynsha, 2011 jyly ol áleýmettik jelilerde bolashaq kúieýimen tanysyp, ata-anasynan qashyp, jigitine Pákistanǵa barǵan.
"2011 jyly Pákistanda turmysqa shyqtym. 2012 jyly kúieýimmen birge shekaradan zańsyz ótip, Túrkiiaǵa kettik. Ol jaqta úsh jyl ómir súrdik, eki qyzymyz dúniege keldi. Sosyn Siriiadaǵy ómir kórsetilgen videorolikterdi qarai bastadyq. Videoda bári jaqsy edi, barlyǵy shariǵat zańymen ómir súredi. 2015 jyly halifat jariialanǵanda biz "nasihaty ótip ketip", Siriiaǵa attandyq", - deidi Dina.
Siriiada áiel taǵy eki bala bosanǵan, sosyn olardy alyp, qashyp ketipti.
"Siriiaǵa keldik, bos turǵan bir úige baryp, tura bastadyq. Alaida Siriiada shyn máninde ómir sonshalyqty jaqsy emes eken. Ol jaqta shariǵat zańymen ómir súrmeidi. DAISh-tyń bizdiń kóship barǵanymyz úshin bergen aqshasyna kún kórdik. Tek bizge basqa soma aityp alyp, ózderi az tólep júrdi, kún ótken saiyn bul tólem azaia bastady. Sońǵy ret 30 dollar ǵana berdi. Bul aqshaǵa tamaq pen qajetti dúnieler satyp aldyq. Rolikterde kórsetilgen keremet ómir, aqsha jáne jaǵdaidyń bári ótirik eken. Shaqyrǵandarynda kelip, kórseńizder bolady dedi. Unamai qalsa, ketip qalasyzdar degendi de qosty. Bul da ótirik. Ol jaqtan sizdi eshkim de jibermeidi", - dep áńgimeledi ol.
Aitýynsha, qashyp shyqpaq bolǵandar ustalyp, túrmege toǵytylypty. Eger adam ókinse, bosatatyn kórinedi, al ókinbei, óz eline ketkisi kelgenderdi óltiripti.
"Úige qaitýymyz qajet dep sheshtik. Biraq elden shyǵý óte qyn. Birinshiden, kimge senip, kimnen kómek suraryńdy bilmeisiń. Sosyn bir siriialyqty taýyp aldyq, ol tek áielderdi shyǵaratyn jerdiń baryn aitty. Qyrkúiekte basqa áieldermen birge kúrdterge baryp, ol jaqta solardyń qolyna berildik. Ol jaqtan 13 qarashada Resei Federatsiiasynyń Groznyi qalasyna alyp ketti. Sol jaqtan úiime, óz ata-anama oraldym", - dedi áiel.
Dinanyń kúieýi bolsa áli Siriiada eken, alaida áiel onyń da, óziniń de qarýly qaqtyǵystarǵa qatyspaǵanyn aitady. "Áli Siriiada, sebebi er adamdardy ol jaqtan shyǵarmaidy. Áielder qashatyndyqtan, erlerge óte qaýipti. Otbasy qashyp ketkenin bilse de kúieýimdi óltiredi", - deidi Dina.
Qazir áiel ata-anasynyń qolynda tórt balasymen ómir súrip jatyr. Balalardyń qujaty joq, áiel qujattardy endi jasatyp, balabaqsha men mektepke bergisi keledi.
Portaldyń málimetinshe, áiel Siriiada bolǵany úshin qylmystyq jaýapkershilikke tartylmaidy.
