H.Bókeeva atyndaǵy Batys Qazaqstan oblystyq qazaq drama teatrynda «Jýsan» psihologiialyq dramasynyń premerasy boldy, dep habarlaidy QazAqparat.
Bul – Elbasy tapsyrmasyna sáikes Qazaqstan azamattaryn Siriianyń qaqtyǵys aimaqtarynan qaitarý boiynsha júzege asyrylǵan «Jýsan» operatsiiasy týraly qoiylǵan elimizdegi alǵashqy spektakl.
Drama avtory – jas aqyn, «Semser» ádebi syilyǵynyń iegeri Marlen Ǵilymhan. Bul – onyń osy saladaǵy tyrnaqaldy týyndysy. Óziniń aitýynsha, shyǵarmany jazý bir bólek te, onyń sahnalanýy da erekshe bolady.
Spektakldi rejisser Samal Ábýov sahnalasa, sýretshisi – Murat Mámbetov.
Qoiylym jat jerdegi soǵysqa baryp, odan «Jýsan» operatsiiasy nátijesinde elge oralǵandardyń taǵdyryn beineleidi: qatygez de qarańǵy ómirge tap bolyp, bireýdiń qolyndaǵy qoljaýlyqqa ainalyp, sodan teperish kórgen adamdar. Aldy oqqa ushsa, arty túrmege qamalyp jatqan jastar.
«Jýsan» operatsiiasymen elge qaitqan Qaraqat esimdi jas kelinshekti Juldyz Mamedova somdasa, Quralbek Qatshaev, Salaýat Túmenov, Daryn Muhtarov, Qazaqstannyń eńbek sińirgen qairatkeri Ásel Mámbetova, Jylqybai Jubatov, Nazgúl Batanova, Asyljan Jakinder de óz rólderin barynsha nanymdy alyp shyǵa bilgen.
Eń bastysy, spektakl kórermenderdi oilandyrady, abaisyzda ot basýdan saqtandyrady.
«Mundai óte kúrdeli, ózekti taqyrypqa barý ońai emes, saqtyqty, úlken daiyndyqty qajet etedi. Osy oraida teolog mamandarmen de aqyldastyq. Kórermenderdiń qabyldaýy jaman emes, jyly pikirler aitylyp jatyr. Aldaǵy ýaqytta teatrǵa basqa elderden de rejisserlar kelip, óz spektaklderin qoimaqshy. Mundaǵy maqsat – olardyń da is-tájiribelerin, sheberlikterin kóre otyryp, teatrdy álemdik deńgeige qarai kóterý», - dedi teatrdyń bas rejisseri Samal Ábýov.
