QR Syrtqy ister ministriligi qarýly qaqtyǵystarǵa ketken azamattardyń sanyna qatysty resmi málimetti jariialady. Atalǵan statistika konsýldyq qyzmetken túsken ótinishterge negizdelip otyr, dep habarlaidy "Ult aqparat".
QR Syrtqy ister ministrliginiń baspasóz hatshysy Aibek Smadiiarovtyń aitýynsha, búginde qarýly qaqtyǵystarǵa ketken qazaqstandyqtardy jáne olardyń týǵan-týystaryn qaitarý boiynsha tiisti jumystar atqarylyp keledi. Olardy elge qaitarýdyń san alýan joldary qaralýda. Osyǵan bailanysty Syrtqy ister ministrligi basqa da quzyreti memlekettik organdarmen birlesip jumys jasap jatyr. Sebebi barlyq aqparattardy jan-jaqty tekserý kerek. «Qazirgi kezde konsýldyq qyzmet departamentine 20-dan astam ótinish tústi. Sonyń ishinde qarýly qaqtyǵystarǵa ketken azamattardyń ózderi jáne olardyń týǵan-týystary jazǵan ótinishter bar», - dedi A.Smadiiarov Astanada ótken baspasóz máslihatynda.
Onyń sózine qaraǵanda, Siriianyń ózinde resmi túrde 22 Qazaqstan azamaty tirkelgen. Olardyń barlyǵy - konsýldyq qyzmette tirkeýge turǵandar. «Sonyń ishinde 21-i - Siriia azamattaryna turmysqa shyqqan qazaqstandyq qyz-kelinshekter. Taǵy bir adam - er azamat. Ol jumys babymen júr. Qalǵan azamattarǵa qatysty aqparat joq. Sebebi olar tirkeýge turmaǵan. Qazirgi kezde biz osy máselemen ainalysyp jatyrmyz», - dep atap kórsetti A.Smadiiarov.
