Siriiada Izrail kúshteriniń shabýylynan Bashar Asad pen odaqtas el áskeriniń keminde 40 sarbazy mert boldy. Ondaǵan adam jaralandy. Bul málimetti Azattyqtyń Iran qyzmeti - Farda radiosyna siriialyq áskeri derekkózi habarlaǵan.
Reuters málimetinshe, izraildikter Irannan Siriiaǵa ásker men qarý-jaraq tasymaldaityn baǵytty nysanaǵa alǵan. Amerika barlaý qyzmetindegi joǵary laýazymdy tulǵa sózine súiengen Associated Press agenttigi operatsiianyń AQSh barlaý qyzmetiniń derekteri negizinde júrgizilgenin jazdy.
Britandyq quqyq qorǵaýshylardyń málimetine qaraǵanda, TsAHAL (Izrail qorǵanys armiiasy) Irak shekarasyna jaqyn Deir-ez-Zor qalasynyń shyǵysynda 20 shaqty soqqy bergen.
Qaza bolǵandar men zardap shekkenderdiń ulty aitylmaidy. Alaida baqylaýshylar atalǵan aýmaqta "Hezbolla" jáne "Fatimiiýn brigadasy" quramynda soǵysyp jatqan tegi aýǵan irandyq ásker shoǵyrlanǵanyn aitady.
Shabýyldy Izrail jasaǵanyn Damaskige qaraityn SANA agenttigi de rastaidy. Shabýyl jaily basqa málimet joq.
Izrail qorǵanys ministrligi túsinikteme bermedi. Tel-Aviv jalpy aimaqtaǵy áskeri-áýe operatsiialary jaily habarlamany sirek taratady. Soǵan qaramastan keiingi jyldary Izrail áskeri Siriiada Iran kúshteriniń bekýine jol bermes úshin birneshe júz shabýyl jasaǵan degen derek bar.
Asad Resei jáne Iran kómegimen kóterilisshilerdi eldiń biraz bóliginen tyqsyrǵan. Sonyń saldarynan kóp adam qaza boldy, myńdaǵan adam bosqynshylap ketti. Biraq Idlib provintsiiasy Asad baqylaýyna ótken joq. Onda Túrkiia dem bergen qarýly oppozitsiianyń ondaǵan myń jasaǵy shoǵyrlanǵan.
