Elimizde Siriiaǵa ketken qazaqstandyqtardy elge qaitarý úshin «Jýsan» operatsiiasy qolǵa alyndy. Osy ýaqytqa deiin «Jýsan-1» operatsiiasynan - 47 adam, «Jýsan-2» operatsiiasynyń arqasynda 231 adam, «Jýsan-3» operatsiiasy arqyly 230-ǵa jýyq adam elge qaitty. Solardyń ishinde Saltanat esimdi jasósipirimde bar. Qazir onymen mamandar jumys istep jatyr.
Saltanatty bizben kezdesýge áreń kóndirdik. Ol bizge jarty saǵat ýaqyt berdi. Odan artyq sóilespeimin dep shart qoidy. Kóndik. Biz barǵanymyzda terezeniń aldynda tur eken. Suraq qoimastan áńgimesin bastap ketti.
«Ókinem. Kóp qiynshylyq kórdim. Balalyq shaǵymdy ótkizdim. Qyzyqty shaǵymdy tek ýaiym qaiǵymen ótkizip jiberippin»,- dedi ol daýsy dirildep.
Qarshadai qyzdyń kórmegen qorlyǵy joq. Nebári 15 jasta bolsa da, ómirdiń nebir sumdyǵyn basynan ótkergen. Sol kórgen azaby «endi qaitalanbasa eken degen» nietpen shyǵar... Shyn esimin jasyryp, ol ózin Saltanat dep tanystyrdy. Bal balalyǵyn urlap, bu dúnieniń tozaǵyn kórsetken basqa emes, Saltanattyń óz anasy. Bári onyń lańkester ylań salyp jatqan Taiaý Shyǵysqa taban tireýinen bastaldy. Ol kúnder Saltanatttyń asa esinde joq. Nebári 7 jasta bolatyn. Tek anasynyń aiaq astynan býynyp - túiinip, aldymen Túrkiiaǵa keiin Siriiaǵa qydyryp baramyz degeni esinde qalypty.
«Basqy kez qatty esimde joq. Kishkentai bolǵan soń tek buryshta otyratynmyn úlkenderdiń qasynda. Basynda barǵan kezde jaqsy qarsy aldy. 3 aidai jaqsy turdyq. Sol jerdegi adamdar bizdi shekaradan ótkende mashinamen kútip aldy. Jarty jyldan soń jaý jaqyndap, artqa qashyp, 20 kúndei dalada jattyq. Avtobýsta, meshitterge qondyq. Ash qalǵan kúnderimizde boldy», - deidi Saltanat.
Saltanat eseigen saiyn, Siriiadaǵy jaǵdai da, qiyndai tústi. Kúnnen kúnge údegen jarylystar, aýyl qalanyń bárin qiratty. Halyq qoisha qyryldy. Aman-qalǵandary bas saýǵalap kóship-qonýmen álek boldy. Shyqpa janym shyqpanyń kúiin keshken Saltanattyń da qansha qalada turǵany esinde joq.Tek áne-mine ólip ketem be degen qashyp -pysqan tirshiliktiń qajytqanyn aitady. Qazir ol qaqtyǵystyń qaq ortasynan qalai aman kelgenine tań qalady. Óitkeni ol jaqta qolyna qarý ustaǵan erler ǵana emes. Eshkimge ziiany joq qarttar men balalarda ólip jatyr. Biri-jarylystan, biri ashtyqtan, al endi biri las, tyshqani tirshilikten týyndaǵan juqpaly aýrýlardan.
«Adamdar ólip jatty. Qazaqtar kóp boldy. Qai ýaqytta ólemiz bilmeimiz daiyndalyp júrdik. Dalada adasyp qalǵan balalar boldy. Olardyń analary qaitys bolyp ketken. Turyp jatqan jerimizden qýyp jiberetin. Kóp tamaq jeisińder dep. Qyzdardy tanymaityn bireýlerge berip jiberetin», - dep eske aldy ol.
Saltanattyń anasy Siriiada kóp qinalypty. Sham elinde baqytty ǵumyr keshemiz, ómir boiy súiip ótemin dep aldap shaqyrǵan radikal azamaty áldeqashan ólip qalǵan.Odan beri birnesheýimen nekelesken eken. Al, boijetip qalǵan qyzyna qorǵan bola almaǵan soń 11 jasynda turmysqa beripti. Joldasy men otbasylyq ómiri jaiynda, Saltanat ashyp aitqysy kelmedi. Bólisýge bolmaityn qupiiasy bar ma? Álde bitken jaranyń aýzyn tyrnaǵysy kelmedi me kúieýi týraly tis jarmady. Tek balalyq shaǵynyń qor bolǵanyn aita berdi.
«7 jyl ómirim tústei ótti. Óz elimde ózimdi basqasha sezine bastadym. Balalyq shaǵymdy qaitara almaimyn, qyzyq ýaqytymnyń bári ótip ketipti. Eske túsirsem, bombadan qashyp júrgen kezim túsedi. Erteńgi kúnim qandai bolady. Qai jerge baramyz. Qandai ýaqytta ótip ketýimiz múmkin. Qandai ýaqytta ólip ketýimiz múmkin bilmeimiz. Ózim de, joldasym da bilmeidi. Sonyń artynan erip júre berdim. Árkim qara basynyń qamyn oilaidy. Eshkimniń eshkimge qarailaityn murshasy joq. Ásirese, jetimder men jesirler qorǵansyzdyń kúiin keshedi. Kúieýi ólgen áielder - lańkesterdiń oljasy. Ulynyń qolyna qarý berip ózderi sekildi qanpezer qylady. Al, anasy men qyzyn qoljaýlyq qyp saýdaǵa salady», - deidi ol.
Elge oralýǵa múmkindik týǵan sátte anasy tek Saltanattyń ózin ǵana jiberipti. Bolashaǵy alda, áli-aq ońalyp keter dese kerek. Al ózi kishkentai qyzymen birge Siriiada qalypty. Otanǵa oralmas buryn Saltanat ta kóp oilanypty.
«Bizge Sham elindegiler elderińe qaitýshy bolmańdar deitin. Barsańdar, qamaidy senderdi dep qorqytty. Basynda mende qoryqtym. Biraq qazir ókinbeimin. Sol jaqta qalǵan anam men sińilimdi oilaimyn. Olardyń kúni ne bolmaq, sony ýaiymdaimyn», - dedi Saltanat.
«Jýsan» dep aidarlanǵan shara beikúná balalardy adastyrmaý úshin qajet. Jurtta jyraqta qaldyrmaý úshin qajet. Olar qazir jazǵyrýdan góri janashyrlyqqa muqtaj. Saltanattyń alǵa qoiǵan maqsat armandary bar. Ońaltý sharalary aiaqtalǵan soń oqýyn jalǵastyrǵysy keledi.
