Qazaqstannyń arqasynda talai siriialyqtyń ómiri saqtaldy. Bul týraly búgin Astana protsesi 6-shy raýndynyń qorytyndysyna orai ótken brifingte kelissózder jónindegi siriialyq joǵary komitettiń keńesshisi Iahia al-Aridi aitty, dep habarlaidy QazAqparat.
«Qazaqstanǵa bizdi qabyldaǵany úshin, shielenistiń basylý protsesine zor úles qosyp, jaǵdai ýshyqqan aimaqtyń ómirin saqtaǵany úshin alǵysymdy bildiremin. Ol 7 jylǵa sozylǵan soǵysty toqtatý úshin Siriiada bitimniń, tynyshtyqtyń ornaýyna qol jetkizýge umtylýda», - dedi ol.
Sonymen qatar elordada eki kúnge sozylǵan kezdesýlerde qandai jaittar kóterilgendigin de aitty.
«Bul raýndtyń aiasynda eki mańyzdy másele kóterildi. Eń birinshisi Idlib ólkesindegi problema jáne ony basqa da deeskalatsiia aimaǵyna qosý boldy. Kelesi bir másele túrmedegi tutqyndar jaiy boldy. Keibireýler olardy «tiridei kómilgender» dep te aitady. Ol jaqta ondaǵan myń adam bar. Olardyń myńdaǵany zorlyq-zombylyqpen óltirildi. Ókinishke orai kepilgerler tarabynan rejim aldynda bul máseleni kóterýge batyldyq jetispedi», - dedi Iahia al-Aridi.
Buǵan deiin habarlaǵanymyzdai, 6-shy raýnd nátijesinde deskalatsiia aimaǵynyń Shyǵys Gýtta, Homs ólkesi soltústiginiń belgili bir bólikterinde, Idlib ólkesinde jáne kórshiles ólkelerdegi jekelegen aýdandarda 4 qaýipsiz aimaq qurylǵan edi.
