Resei, Iran jáne Túrkiianyń resmi ókilderi Astanada aiaqtalǵan Siriia beibit kelissóziniń qorytyndysy boiynsha Siriiadaǵy álsiz bitimge baqylaý jasaý mehanizmin qurýǵa kelisti. Biraq olar Siriiadaǵy alty jylǵa sozylǵan soǵysty saiasi jolmen toqtatý baǵytynda ilgeri qadam jasai almady.
Bul qorytyndy málimdemege kelissózge qatysqan Siriia oppozitsiiasynyń kóńili tolmady. Oppozitsiia ókilderi qaqtyǵysty toqtatý rejimin buzýǵa baqylaý jasaýdyń óz josparyn usyndy. Siriia oppozitsiiasy delegatsiiasynyń basshysy Mohammed Allýsh oppozitsiianyń kelissózdiń qorytyndysy týraly ortaq málimdemege qatysty basty eskertpeleriniń biri qujattaǵy "retteý" sóziniń qoldanylýy ekenin málimdedi.
"Biz munda retteý úshin kelgen joqpyz. Biz daǵdarysty bilikti almastyrýǵa alyp keletindei etip saiasi sheshetin kelissóz júrgizýge keldik. Bul sheshim alǵashqy kezeń, iaǵni qaqtyǵysty toqtatý arqyly iske asady" dedi Allýsh. Ol sonymen birge oppozitsiia "territoriialarda qaqtyǵysty toqtatý rejimi naqty ornatylmaiynsha" daǵdarysty saiasi jolmen sheshý mehanizmderin talqylamaitynyn jetkizdi.
Allýshtyń sózinshe, qaqtyǵys rasymen toqtaǵan soń "gýmanitarlyq sharalar qabyldanýy tiis", oppozitsiia sodan keiin ǵana daǵdarysty yqtimal saiasi jolmen sheshýge kirisedi. Ol buǵan qosa bitimdi baqylaýdyń balamaly mehanizmderi "bitimniń qanshalyqty buzylǵanyn, onyń aýqymy men kim buzǵanyn" anyqtaýǵa kómektesedi. Allýshtyń aitýynsha, bul týraly qujat Astanada kelissózge qatysqan Resei, Túrkiia jáne BUU ókilderine berilgen.
Al Siriia oppozitsiiasy delegatsiiasynyń ókili, "Siriia erikti armiiasynyń" da ókili sanalatyn Osama Abý Zeid oppozitsiiany jasaqtary bitimge monitoring jasaý mehanizmi jónindegi kelisimge qospaǵanyn aitady. "Bul - Túrkiia, Resei jáne Iran arasyndaǵy kelisim. Olar egemen memleketter jáne ózderi qalaǵan kez-kelgen kelisim jasai alady. Qorytyndy málimdeme qabyldanatyn kezde biz biraz eskertpemiz baryn aittyq. Buǵan qosa, Iran "kepil berýshi memleket" dep kórsetilipti" dedi Osama Abý Zeid.
