Halyqtyń densaýlyǵyn saqtaýda alǵashqy meditsinalyq sanitarlyq kómek negizgi ról oinaidy. Adamdar alǵashqy kómekti aýrýhanaǵa jatpas buryn osy jerden alady.
COVID-19-ben kúreste Singapýr basymdyqty osy alǵashqy meditsinalyq sanitarlyq kómekti damytýǵa salyp otyr.
Bul oiymen Sanjar Asfendiiarov atyndaǵy qazaq ulttyq ýniversitetiniń ujymymen onlain suhbattasý barysynda Singapýr Qoǵamdyq densaýlyq saqtaý mektebiniń dekany, professor Teo Ik In bólisti.
«Biz 2003 jyly SARS epidemiiasy kezinde aýyr soqqy aldyq. Álem boiynsha sonda SARS-tan Singapýr eń qatty zardap shekti. 238 adam juqtyryp, 33 adam kóz jumdy. Sol kezde-aq biz densaýlyq saqtaý salasynda ózgeris kerek ekenin túsindik», - dedi maman.
Singapýr mamandary 2020 jyly qańtarda koronavirýs adamnan adamǵa juqpaidy dep oilaǵan.
«9 ai ótken soń adamnan adamǵa juǵatyny, adamdar simptomsyz tasymaldaityny anyqtaldy. Sondyqtan densaýlyq saqtaý saiasaty evoliýtsiiamen damyp otyrýy kerek. Kez kelgen virýsty aýyzdyqtaimyn degen memleket úshin áleýmettik qashyqtyqty saqtaý, maska taǵý óte ózekti másele bolyp otyr. Jaqynda ǵana, 5 apta buryn biz Gonkongtan jańa málimet aldyq. Koronavirýspen bir ret aýyrǵan adam qaitadan juqtyrǵan. Sondyqtan, ujymdyq immýnitet degen strategiianyń qazir múlde paidasy joq. Qazirgi másele vaktsina bolyp otyr», - dedi ol.
Mamannyń aitýynsha, jyldyń basynda Singapýrdyń saiasatyn koronavirýspen kúresýde altyn standart dep ataǵany ras.
Alaida 2 aidan soń másele ýshyǵa bastady.
«Ahýal kez kelgen ýaqytta qiyndaýy múmkin. Adam ólimi statistikasy áp sátte ózgerýi múmkin. 0-den 100-ge jetip, lokdaýn týraly sheshim qabyldanýy arasynda kóp ýaqyt kerek emes. Sońǵy eki aida bizde adam ólimi 5-ten az bolyp turǵan. Keide múlde adam ólimi tirkelmeitin kúnder bolady. Kópshiligi jataqhanalarda turatyn shetelden kelgen migranttar arasynda órship jatyr. Virýs kóbinese syrttan kelgenderden juǵyp jatyr. Qańtarda QHR elinen kelgen adamdardan taralsa, keiinirek AQSh pen Eýropadan Singapýr azamattary qaita orala bastady. Biz úshin eń basty másele – shekarany basqarý», - dedi professor Teo Ik In.
Pandemiia bastalǵan kezde Singapýr saiasatkerleri durys boljam jasaý úshin ǵalymdar, epidemiologtar, infektsiialyq modeldeý mamandarynan keńes alyp otyrdy.
«SARS epidemiiasy bolǵan 2003 jyldan beri bizdiń mamandar barlyq krizistik ahýaldarǵa úirengen. Densaýlyq saqtaý uiymdary tótenshe jaǵdai rejimine tez aýysa alady. Onyń barlyǵy tájiribeden ótken. Singapýrda qazir 56 myń adam koronavirýs juqtyrǵan.
Onyń ishinde 28 adam qaitys bolǵan. Dárigerlerdiń arasynda 10 adam ǵana juqtyrǵan. Bul alǵashqy meditsinalyq sanitarlyq kómek býynynyń daiyndyǵyn kórsetse kerek», - dedi professor.
