Almatyda ambýlatoriialyq deńgeide aýqymdy jumys júrgizilýde. Simptomsyz naýqastardy mobildik brigada qadaǵalaidy. Bul týraly onlain brifing barysynda qalalyq densaýlyq saqtaý basqarmasynyń basshysy Kamaljan Nadyrov aitty, dep habarlaidy QazAqparat.
Onyń aitýynsha, qaladaǵy ár emhanada bekitilgen reglamentke sáikes patsientterdi monitoringileýmen ainalysatyn mobildi brigadalar qurylǵan. Búgingi kúni olardyń sany – 72. Mobildi toptyń quramyna bólimshe meńgerýshileri, infektsionist dárigerler, epidemiologtar, ýchaskelik dárigerler men meiirbikeler kiredi. Barlyǵy 287 meditsina qyzmetkeri jumyldyrylǵan.
«Qazirgi ýaqytta qalada ambýlatoriialyq deńgeide monitoringte 2986 adam bar, onyń ishinde simptomsyz túrimen 2365 adam aýyryp jatyr. Bul - naýqastardyń 79%. 621 adamnyń simptomdary bar, olardyń úlesi 21%-dy quraidy. Ambýlatoriialyq deńgeide simptomdary bar aýyrlyqtyń jeńil dárejesinde 555 adam – 89%, aýyrlyqtyń ortasha dárejesinde - 66 adam nemese baqylaý júrgizilgen adamdardyń 11%. Sozylmaly aýrýlary bar, táýekel tobyndaǵy 60 jastan asqan adamdarǵa erekshe kóńil bólinýde, qazirgi ýaqytta olardyń sany – 94 adam», – dedi Kamaljan Nadyrov.
Sonymen qatar, ol dene qyzýy kishkene kóterilgeni úshin mindetti túrde aýrýhanaǵa jatýdyń qajeti joq ekenin aitty.
«Munda biz virtýaldy juqpaly aýrýlar aýrýhanasyn ashyp, rastalǵan jaǵdailarda da, koronavirýstyń yqtimal jaǵdailary bar patsientterdiń densaýlyq jaǵdaiyna monitoring júrgizýdemiz. Tájiribe kórsetkendei, bul jerde eń qiyny - indettiń simptomsyz nemese jeńil túri bar halyqty úide otyrýǵa kóndirý. Áitkenmen statsionarlardyń tósek-orny tolyp qalýyna bailanysty barsha halyqqa eń aldymen úreige boi aldyrmai, bolmashy dene qyzýy aýrýhanaǵa jatqyzýǵa sebep bolmaitynyn aitqym keledi», – dedi ol.
