Syrtqy ister ministriniń orynbasary Erjan Ashyqbaev reseilik jýrnalist Vladimir Solovevtiń Qazaqstan men Resei arasyndaǵy qarym-qatynasyna qatysty aitqan sózderine túsinikteme berdi, dep habarlaidy Sputnik Qazaqstan tilshisi.
"Mundai jańalyq tústi. Ókinishke qarai, bizdiń kórshiles, baýyrlas elde oqtyn-oqtyn osyndai sipattaǵy pikirler aitylyp qalady. Eń áýeli, biz RF memlekettik organdarynyń resmi pikirlerine qulaq asamyz. Memleket basshysy Nursultan Nazarbaevtyń Resei prezidenti Pýtinmen júrgizgen kelissózderiniń qorytyndysy barlyǵyna belgili. Bizde úkimet, memlekettik organdar deńgeiinde senimge qurylǵan syndarly dialog jolǵa qoiylǵan, syrtqy ister ministrlikteri arasynda turaqty túrde konsýltatsiialar júrgiziledi, sondyqtan biz resmi pozitsiiany basshylyqa alamyz", — dedi Ashyqbaev úkimet kýlýarynda.
Ministr orynbasary keibir adamdardyń pikiri eki eldiń qarym-qatynasy ziianyn tigizbes úshin, tiisti sharalar qabyldanatynyn atap ótti.
"Belgili bir sarapshylardyń, qoǵam qairatkerleriniń pikiri eki eldiń strategiialyq odaqtastyǵyna, dostyq qarym-qatynasyna syzat túsirmes úshin biz tiisti sharalar qabyldaimyz", — dedi ol.
Aita ketsek, AQSh, Frantsiia jáne Ulybritaniia Siriiaǵa soqqy jasaǵannan keiin Resei senbi kúni BUU qaýipsizdik keńesiniń shuǵyl otyrysyn shaqyrǵan bolatyn. Máskeý "AQSh pen onyń odaqtastarynyń Siriiaǵa qatysty agressiiasyn" aiyptaityn qarardyń jobasyn taratty. Otyrys barysynda qujatqa daýys berildi. Resei, Qytai jáne Boliviia jaqtap daýys berdi. Segiz el, onyń ishinde AQSh, Frantsiia men Ulybritaniia qarsy shyqty, taǵy tórt el, onyń ishinde Qazaqstan daýys berý kezinde qalys qaldy. Sóitip Reseidiń Siriiaǵa soqqy jasaýdy toqtatýǵa shaqyratyn qararyn BUU qaýipsizdik keńesi qabyldamai tastady.
Ile-shala "Resei" telearnasynyń júrgizýshisi Vladimir Solovev Qazaqstannyń pozitsiiasyna bailanysty pikirin bildirdi.
"Biz Qazaqstanmen qarym-qatynas jaiynda bir nárseni bilmei júrmiz be? Múmkin eki eldiń arasynan qara mysyq júgirip ótken shyǵar? Biz Qazaqstandy jáne Nursultan Ábishulyn óte qatty qurmetteimiz. Biraq osyndai syn saǵattarda ne bolyp jatqanyn túsingiń keledi", — degen edi reseilik telejúrgizýshi.
