Nur-Sultanǵa Astana protsesi aiasyndaǵy Siriia kelissóziniń 25-26 sáýirde ótetin 12-kezeńine qatysýǵa taraptar kelip jatyr. Bul týraly Qazaqstan syrtqy ister ministrligi habarlady.
Ministrlik taratqan málimdeme "Resei prezidenttiń Siriia boiynsha arnaiy ókili Aleksandr Lavrentev - alǵash bolyp kelgenderdiń biri. Iran delegatsiiasyn syrtqy ister ministrliginiń saiasi máseleler boiynsha aǵa kómekshisi Áli Asgar Hadji, Túrkiia tarapyn syrtqy ister ministriniń orynbasary Sedat Onal bastap keldi" dep jazylǵan.
Protseske qatysýǵa kelgender arasynda Siriia úkimeti men qarýlanǵan oppozitsiia delegatsiiasy bar. Ministrlik habaryna qaraǵanda, 12-kezeńge baqylaýshy retinde Iordaniia, BUU-nyń bosqyndar isi boiynsha joǵarǵy komissar basqarmasy men Qyzyl krest halyqaralyq komitetiniń ókilderi qatysady.
Syrtqy ister ministrligi "Astana protsesine alǵash ret qatysqaly jatqan BUU bas hatshysynyń arnaýly elshisi Geir Pedersen búgin keledi" dep habarlady.
Nur-Sultan josparynsha, 25 sáýirde - eki jaqty, úsh jaqty keńes berý jiyndary, 26 sáýirde qujattardy qabyldaý úshin keńeitilgen jiyn ótedi.
Astana kelissózi 2017 jyly qańtarda Resei prezidenti Vladimir Pýtinniń usynyp, Qazaqstannyń eks-prezidenti Nursultan Nazarbaev ony qoldaǵan soń bastalǵan. Nur-Sultandaǵy Siriia beibit kelissózi Jenevadaǵy BUU bastamasymen ashylǵan kelissózden bólek ótedi.
Kelissóz Siriiadaǵy azamattyq soǵysty toqtatýdy kózdeidi. Buǵan deiin AQSh Máskeý men Damaskini Astanadaǵy kelissózden nátije shyǵara almai otyr dep synaǵan. AQSh Memlekettik departamentiniń resmi ókili Hizer Noiert kelissózdi "fars" dep ataǵan.
