Qazaqstan syrtqy ister ministrligi Resei memlekettik dýmasynyń depýtaty Pavel Shperovtiń Qazaqstannyń territoriialyq tutastyǵy jóninde aitqan sózderine qatysty Resei syrtqy ister ministrligine alańdaýshylyǵyn bildirdi, - dep habarlady ministrliktiń baspasóz hatshysy Ánýar Jainaqov.
SIM málimetinshe, keshe Qazaqstan syrtqy ister ministriniń birinshi orynbasary Muhtar Tileýberdi Resei syrtqy ister ministriniń orynbasary - Stats-hatshy Grigorii Karasinmen telefonmen sóilesip, eki jaqty yntymaqtastyq máselelerin talqylaǵan. Taraptar aimaqtyq jáne halyqaralyq kún tártibinde turǵan ózekti máseleler boiynsha pikir almasqan.
Reseilik aqparat quraldary 27 qańtarda Pavel Shperovtiń Memlekettik dýmada ótken "Shetelderdegi otandastar: ótken shaq pen qazirgi ýaqyt" degen taqyryptaǵy dóńgelek ústelde jaqyn shetelderdegi, onyń ishinde Qazaqstandaǵy orystardy diaspora dep ataýdy "saiasi qatelik" dep atap, olar turatyn territoriianyń "Reseidiń ýaqytsha tartyp alynǵan jerleri" ekenin aitqanyn habarlaǵan. Shperov "shekaralardyń máńgilik emesin" aityp, Resei jaqyn bolashaqta óziniń "memlekettik shekarasyna oralatynyn" aitqan.
SIM Resei depýtatynyń sózinde onyń Qazaqstannyń territoriiasyna qatysty talap-shaǵymy bary baiqalatynyn, biraq Resei jaǵy Qazaqstan syrtqy ister ministrliginiń úndeýin baiypty qabyldaǵanyn aitady.
