Syrtqy ister ministri Muhtar Tileýberdi Máskeý qalalyq dýmasynyń depýtaty tarapynan aitylǵan «Qazaqstandy denatsifikatsiialaý» týraly málimdemege qatysty pikir bildirdi, dep habarlaidy "Ult aqparat".
"Depýtattyń málimdemesine bailanysty Qazaqstan Reseige resmi túrde nota jibere me?" degen suraqqa Tileýberdi ministrlik tek "federaldyq deńgeidegi málimdemelerge" ǵana reaktsiia bildiredi dedi.
«Aitylǵan ár málimdemeni jeke-jeke qarastyryp, kim aitsa, sol deńgeide jaýap berý kerek. Mysaly, buǵan deiin Ziýganovtyń (Resei memlekettik dýmasynyń depýtaty - red.) aitqanyna bizdiń depýtattar óz baǵasyn berdi. Al bul málimdeme - Máskeý qalalyq keńesiniń depýtatyniki. Ol - federaldyq deńgei emes. Federaldyq deńgeiden tómen, qalalyq dýma ma, basqa ma – ondai málimdemelerge bizdiń bloger, saiasatker, ekspertterimiz jaýap berýi kerek», - dep jaýap berdi ol.
Onyń aitýynsha, Qazaqstan syrtqy ister ministrligi "federaldyq deńgeide aitylǵan málimdemelerge buǵan deiin jaýap bergen".
Al Ulttyq ekonomika ministri Álibek Qýantyrov buǵan qatty jaýap qatýdyń keregi joq dep esepteidi.
«Bul suraq meniń salama qatysty emes. Degenmen jeke pikirim bar. Mundai nárselerdiń aitylýy, álbette, jaǵymsyz. Biraq sondai qatty jaýap berýdiń keregi joq. Óitkeni biz toqtap qalmaimyz. Óz jaiymyzdy, ekonomikamyzdy, halqymyzdy oilaýymyz kerek. Belgisiz adamdardyń túsiniksiz málimdemelerine qarailaýdyń keregi joq», - deidi Qýantyrov.
Aita ketsek, buǵan deiin Máskeý qalalyq dýmasynyń depýtaty Sergei Savostianov Qazaqstandy Ýkrainadai «denatsifikatsiialaýǵa», «demilitarizatsiialaýǵa» shaqyrǵan bolatyn.
