سىرتقى ٸستەر مينيسترٸ مۇحتار تٸلەۋبەردٸ مەسكەۋ قالالىق دۋماسىنىڭ دەپۋتاتى تاراپىنان ايتىلعان «قازاقستاندى دەناتسيفيكاتسييالاۋ» تۋرالى مەلٸمدەمەگە قاتىستى پٸكٸر بٸلدٸردٸ, دەپ حابارلايدى "ۇلت اقپارات".
"دەپۋتاتتىڭ مەلٸمدەمەسٸنە بايلانىستى قازاقستان رەسەيگە رەسمي تٷردە نوتا جٸبەرە مە?" دەگەن سۇراققا تٸلەۋبەردٸ مينيسترلٸك تەك "فەدەرالدىق دەڭگەيدەگٸ مەلٸمدەمەلەرگە" عانا رەاكتسييا بٸلدٸرەدٸ دەدٸ.
«ايتىلعان ەر مەلٸمدەمەنٸ جەكە-جەكە قاراستىرىپ, كٸم ايتسا, سول دەڭگەيدە جاۋاپ بەرۋ كەرەك. مىسالى, بۇعان دەيٸن زيۋگانوۆتىڭ (رەسەي مەملەكەتتٸك دۋماسىنىڭ دەپۋتاتى - رەد.) ايتقانىنا بٸزدٸڭ دەپۋتاتتار ٶز باعاسىن بەردٸ. ال بۇل مەلٸمدەمە - مەسكەۋ قالالىق كەڭەسٸنٸڭ دەپۋتاتىنٸكٸ. ول - فەدەرالدىق دەڭگەي ەمەس. فەدەرالدىق دەڭگەيدەن تٶمەن, قالالىق دۋما ما, باسقا ما – ونداي مەلٸمدەمەلەرگە بٸزدٸڭ بلوگەر, ساياساتكەر, ەكسپەرتتەرٸمٸز جاۋاپ بەرۋٸ كەرەك», - دەپ جاۋاپ بەردٸ ول.
ونىڭ ايتۋىنشا, قازاقستان سىرتقى ٸستەر مينيسترلٸگٸ "فەدەرالدىق دەڭگەيدە ايتىلعان مەلٸمدەمەلەرگە بۇعان دەيٸن جاۋاپ بەرگەن".
ال ۇلتتىق ەكونوميكا مينيسترٸ ەلٸبەك قۋانتىروۆ بۇعان قاتتى جاۋاپ قاتۋدىڭ كەرەگٸ جوق دەپ ەسەپتەيدٸ.
«بۇل سۇراق مەنٸڭ سالاما قاتىستى ەمەس. دەگەنمەن جەكە پٸكٸرٸم بار. مۇنداي نەرسەلەردٸڭ ايتىلۋى, ەلبەتتە, جاعىمسىز. بٸراق سونداي قاتتى جاۋاپ بەرۋدٸڭ كەرەگٸ جوق. ٶيتكەنٸ بٸز توقتاپ قالمايمىز. ٶز جايىمىزدى, ەكونوميكامىزدى, حالقىمىزدى ويلاۋىمىز كەرەك. بەلگٸسٸز ادامداردىڭ تٷسٸنٸكسٸز مەلٸمدەمەلەرٸنە قارايلاۋدىڭ كەرەگٸ جوق», - دەيدٸ قۋانتىروۆ.
ايتا كەتسەك, بۇعان دەيٸن مەسكەۋ قالالىق دۋماسىنىڭ دەپۋتاتى سەرگەي ساۆوستيانوۆ قازاقستاندى ۋكرايناداي «دەناتسيفيكاتسييالاۋعا», «دەميليتاريزاتسييالاۋعا» شاقىرعان بولاتىن.
