Qazaqstannyń Syrtqy ister ministrligi Iranda derekti kino túsirip júrgen qazaqstandyq rejisser, stsenarist ári operator Qanat Beisekeev ustaldy degen aqparatqa qatysty pikir bildirdi, - dep habarlaidy Tengrinews.kz tilshisi.
"Biylǵy 16 maýsymda Qazaqstannyń Gorgan qalasyndaǵy Bas konsýldyǵy úsh adamnan turatyn qazaqstandyq túsirilim tobymen kezdesýi kezinde Iranda túsirilim jasaýǵa arnaýly vizasynyń bolmaǵanyn anyqtap, jergilikti bilikten osy qujatty alýdy keńes etti. Bas konsýldyqtyń málimetinshe, túsirilim toby Qazaqstanǵa ushý úshin Tegeranǵa attanǵany anyqtaldy. Qanat Beisekeev túsirilim jasaýǵa arnaiy ruqsatty alýda konsýldyq mekemesiniń qolǵabys etýinen ýaqytynyń tapshylyǵyna bailanysty bas tartty. Alaida 20 maýsymda túsirilim toby Gorgan qalasyna oralyp, túsirilimin jalǵastyrǵan, munda jergilikti kóshi-qon organdary túsirilimge ruqsatynyń bolmaýyna bailanysty olardan Tegeranǵa oralýyn suraǵan", - delingen vedomstvo habarlamasynda.
Irandaǵy demalys kúnderine qaramastan Bas konsýldyqtyń túsirilim tobynyń qaida ekenin anyqtaý úshin jergilikti bilikpen bailanys ornatýǵa tyrysyp jatqany aitylady. Bas konsýldyq osy másele boiynsha Irannyń Syrtqy ister ministrligine arnaiy nota joldaǵan.
Eske salaiyq munyń aldynda PR-maman Álisher Elikbaev Iranda derekti kino túsirip júrgen qazaqstandyq rejisser, stsenarist ári operator Qanat Beisekeevtiń ustalǵanyn habarlaǵan edi.
"Ol bul elde film túsirip jatyr. Endi Irandaǵy qazaqtar týraly film shyǵa ma, joq pa - belgisiz. Kóp boldy sol jaqta júrgenine. Endi ǵana bilip otyrmyn. Eshqandai da mán-jaiyn bilmeimin. Ony ustap, barlyq qural-jabdyǵyn tárkilepti. Buǵan deiin ol Mońǵoliiadaǵy qazaqtar týraly film túsirgen, keiin Ózbekstanǵa baryp, sondaǵy qazaqtar jaily film túsirgen, endi Iranǵa barǵan", - dedi Álisher Elikbaev.
Onyń aitýynsha, Beisekeevten birneshe myń dollar turatyn qural-jabdyǵy tárkilengen.
