Qazaqstannyń syrtqy ister ministrligi Grýziiada jumbaq jaǵdaida qaza tapqan qazaqstandyq boijetkenge qatysty resmi málimet taratty, dep habarlaidy "Ult aqparat".
«Grýziianyń quqyq qorǵaý organdary bizdiń elshilikke bergen aqparatqa sáikes, biylǵy 5 mamyrda Tbilisi qalasyndaǵy bir úidiń terezeleriniń astynan Qazaqstan azamatynyń denesi tabylǵan. Aldyn ala málimet boiynsha, atalǵan qyz 9-qabattan qulap mert bolǵan» dep málim etti Syrtqy ister ministrligi.
Grýziia politsiiasy ózin-ózi óltirý haline jetkizý degen kúdikpen qylmystyq is qozǵady.
Politsiia kúdiktini qamaýǵa aldy. Basqa aqparat tergeý múddesi úshin jariialanbaidy.
«Grýziiadaǵy Qazaqstan elshiliginiń konsýly marqumnyń otbasymen únemi bailanysta. Bul is elshiliktiń erekshe baqylaýyna alyndy. Qazaqstannyń syrtqy ister ministrligi el azamatynyń denesin otanyna jetkizýge jan-jaqty kómek kórsetip jatyr» delingen habarlamada.
Eske sala keteiik, buǵan deiin birqatar qazaqstandyq BAQ qazaqstandyq boijetkenniń Grýziiada kenetten kóz jumǵanyn habarlaǵan bolatyn.
