Májilis tóraǵasy Nurlan Nyǵmatýlin áleýmettik nysandardy terrorizmge qarsy qorǵaý jumysyn uiymdastyra almai otyrǵan úkimetke shúilikti, dep habarlaidy Sputnik Qazaqstan tilshisi.
Búgin Májilistiń jalpy otyrysynda keibir zańnamalyq aktilerge qylmystyq jolmen alynǵan kiristerdi zańdastyrýǵa jáne terrorizmdi qarjylandyrýǵa qarsy is-qimyl máseleleri boiynsha ózgerister engizý týraly zań jobasy qaraldy. Otyrys barysynda májilis spikeri Nurlan Nyǵmatýlin terroristik turǵydan osal nysandardyń jai-kúiin qozǵady.
Osy tusta ol Ulttyq qaýipsizdik komitetine qarasty antiterroristik ortalyqtyń derekterin keltirdi. Oǵan sáikes, elimizde 10 myń nysannyń 35 protsenti, iaǵni 3,5 myń obektisi terrorizmge qarsy qorǵalmaǵan. Olar mádeniet pen bilim berý uiymdary.
"Oǵan aqshanyń jetpeýi sebep eken. Taǵy bir márte qaitalap aitamyn, bul antiterroristik ortalyqtyń derekteri", - dedi spiker.
Nyǵmatýlinniń bul ýájine ortalyq shtaby bastyǵynyń orynbasary German Didenko jaýap berdi. Aitýynsha, qazir respýblikada 17 myńǵa jýyq nysan bar jáne olardyń menshik formasy ártúrli. Olardyń arasynda ortalyq apparattyń da, jergilikti deńgeide jáne jekemenshik ieliktegi terroristik turǵydan osal obektileri bar.
"Siz sóz etip otyrǵan nysandarǵa qarjy bólýdi baqylaý, onyń jumsalýyn qadaǵalaý máselesine toqtalsaq. Ákimdikterdiń janynda antiterroristik komissiia jumys isteidi, ony oblys ákimi basqarady. Olar toqsan saiyn otyrysqa jinalyp, osy máselelerdi qarastyrady. Usynystar ázirlenip, ishki ister ministrligi tarapynan keshendi tekseris júrgiziledi. Jyl saiyn ár nysan tekserilip, usynystar daiyndalyp, komissiia otyrysyna shyǵarylady. Al sodan keiin qarjylandyrý máselesi kóteriledi", - dep túsindirdi ol.
Didenko aqsha árkimge birdei bólinbeitinin aitty.
"German Vladimirovich, biz de osyny aityp otyrmyz. Bizde dál osyndai respýblikalyq komissiia bar. Sizder otyrys ótkizgen kezde, bul málimetterdi Úkimetke beresizder. Álihan Ashanuly, dál osy máselege siz qarjy ministri retinde emes, birinshi vitse-premer retinde aralasýyńyz kerek. Ákimdikter Úkimetten bólek emes qoi, ásirese qarjylandyrý máselesinde. Áriptestermen jinalyp, olarǵa mektepterdiń terrorizmge qarsy qorǵalmaǵanyn aitý kerek. Al nysandardyń kimge tiesili ekeni bul ekinshi oryndaǵy másele. Erteń ol ǵimarat opyrylyp qulaǵanda, bizge onyń kimniń menshiginde bolǵany báribir bolady", - dep ashýlandy Nyǵmatýlin.
Májilis spikeri úkimetke bir toqtamǵa kelýge keńes berdi.
"Aqsha bar. Eger de jergilikti nemese ortalyq memlekettik organnyń qandai da bir basshysy jaýapkershilikti sezinbese, onda úkimet ony shaqyryp, bir "silkilep" alsyn. Mekteptegi balalardyń, halyq kóp jinalatyn oryndarda azamattardyń qaýipsizdigin qamtamasyz etý – bizdiń mindetimiz. Bilik degenimiz siz ben biz. Bul ne degen beiqamdyq?", - dedi tómengi palata tóraǵasy.
Nyǵmatýlin birinshi vitse-premer Álihan Smaiylovqa Úkimetke terroristik turǵydan osal áleýmettik nysandardyń máselesin nazarda ustaýdy tapsyrdy.
"Usynystar bar, olar halyqaralyq talaptarǵa sai keledi. Qarjylandyrý jaǵynan biz sizderdi qoldaimyz. Biraq úkimet tarapynan bul jumysty uiymdastyrý jaǵy aqsap tur. Bilim men mádeniettiń 3,5 myń nysany talapqa sai emes degen másele kún tártibinde turmaýy tiis. Mundai nysandar múlde bolmaýy kerek", - dep qadap aitty májilis spikeri.
Smaiylov mektepterde eń bastysy beinekamera ornatý qajet ekenin atap ótti. Budan bólek, tiisti ofitser otyrýy kerek.
"Qazir Úkimet terrorizmge jáne dini ekstremizmge qarsy jumystardyń mańyzdylyǵyn eskere otyryp, bes jylǵa tiisti baǵdarlama qabyldady. Baǵdarlamany qarjylandyrý jaǵy da sheshildi. Onyń aiasynda terrorizmge qarsy is qimyldy iske asyrý qarastyrylǵan. Biyl sol baǵdarlamany júzege asyrý úshin 58 milliard teńge bólip otyrmyz. Kelesi jyly 26 milliard teńge, ári qarai jyl saiyn 36 milliard teńge bólemiz", - dedi qarjy ministri májilis kýlýarynda.
Budan bólek, onyń aitýynsha, jergilikti atqarýshy organdar óz biýdjetinen jergilikti nysandarǵa terrorizmge qarsy kúres úshin qosymsha qarajat bólýi kerek.
