Qytai Halyq Respýblikasynyń tóraǵasy Si Tszinpin Qazaqstan Prezidenti Nursultan Nazarbaevty Naýryz meiramymen quttyqtady, dep habarlaidy "Ult aqparat".
«Búgin biz jaqsy bir habar aldyq. Qytai Halyq Respýblikasynyń tóraǵasy Si Tszinpin Naýryz meiramyna bailanysty Qazaqstan Prezidenti Nursultan Ábishuly Nazarbaevqa arnaiy quttyqtaý hatyn joldap, barsha qazaqstandyqtardy osy merekemen quttyqtady. Qazirgi kezde Qytaida úlken eki jinalys boiynsha aýqymdy sharalar ótip jatyr. Soǵan qaramastan, Si Tszinpin myrza ýaqyt taýyp, Nursultan Ábishulyna arnaiy jedelhatyn joldady. Osynyń ózi eki basshy arasyndaǵy myqty dostyqtyń kórinisi bolsa kerek», - dedi QHR-dyń Qazaqstandaǵy Tótenshe jáne Ókiletti elshisi Chjan Hanhýei búgin Naýryz meiramyna arnalǵan saltanatty sharada.
Elshiniń aitýynsha, búginde eki el arasyndaǵy saýda-ekonomikalyq bailanystar oidaǵydai damyp keledi. Kórshi memleket Qazaqstan ekonomikasyna qyrýar qarjy salyp otyr. «Bir jol - bir beldeý» bastamasy aiasynda ózara yntymaqtastyq ta kúsheiip keledi.
«Kommýnistik partiianyń jinalysynda Qytaidyń ekonomikalyq ósimi 6,5 protsent bolady degen maqsat qoiyldy. Halyqtyń tyǵyz ornalasqanyna qaramastan, bizde jan basyna shaqqanda ishki jalpy ónim 9 800 dollardy qurap otyr. Qytai úshin bul - úlken jetistik. 2021 jylǵa deiin biz kedeishilik máselesin tolyǵymen sheshýdi kózdeimiz. Úsh jyldan keiin 400 millionnan astam adam kedeishiliktiń qamytynan qutylady degen jospar bar. Osylaisha, 2021 jylǵa deiin Qytai tolyǵymen orta toptyń deńgeiine shyǵýy tiis. Oǵan deiin kedei otbasylar qalmaýy qajet», - dep atap kórsetti Ch.Hanhýei.
