Shanhai yntymaqtastyq uiymynyń hatshylyǵy epidemiiaǵa qaýpine qarsy birlese kúsh jumyldyrý boiynsha úilestirý keńesin qurýdy usyndy. Bul usynysty uiymnyń bas hatshysy Vladimir Norov bildirdi, dep habarlaidy QazAqparat.
«Shanhai yntymaqtastyq uiymyna múshe memleketterdiń obamen kúres salasyndaǵy yntymaqtastyǵy týraly kelisim jobasy maquldaý satysynda tur. Uiymǵa múshe memleketterdiń jedel jáne júieli ózara is-qimylyn uiymdastyrý úshin ShYU keńistiginde epidemiia qaýpine qarsy birlesken is-qimyl jónindegi úilestirý keńesin qurý - osy baǵyttaǵy naqty qadam bolýy múmkin. Qujat jobasyn ShYU Hatshylyǵy ázirledi. Ózbek jáne tájik taraptary ShYU múshe memleketterdiń syrtqy ister ministrleriniń keńesinde hatshylyqtyń bul usynysyn qoldady. Atalmysh mehanizm múshe memleketterge epidemiologiialyq aýrýlardyń aldyn-alýǵa qatysty keshendi sharalardy ázirleýge jáne iske asyrýǵa arnalǵan», - dedi Vladimir Norov ShYU múshe memleketterdiń densaýlyq saqtaý ministrleriniń otyrysynda.
Onyń aitýynsha, taiaýda Sankt-Peterbýrgte ShYU-ǵa múshe memleketter basshylarynyń sammiti ótedi.
«Uiymǵa múshe memleketterdiń aimaqtaǵy indet qaýpine qarsy turýdyń keshendi is-sharalar josparyn qabyldaý jumysy josparlanýda. Koronavirýs pandemiiasynan týyndaǵan qaýiptiń aýyrlyǵyn eskere otyryp, birlesken kúsh-jiger men ózara qoldaý bul tótenshe jaǵdaidy sátti eńserýge jáne epidemiianyń taralýyn toqtatýǵa múmkindik beredi. Mundai jaǵdaida ShYU densaýlyq saqtaý ministrleriniń keńesi siiaqty praktikalyq ózara is-qimyl tetikteriniń tiimdiligi aitarlyqtai arta túseri daýsyz», - dedi ol.
Eske sala ketsek, búgin Shanhai yntymaqtastyq uiymyna múshe memleketterdiń densaýlyq saqtaý ministrleriniń otyrysy ótken bolatyn.
Otyrysta Resei, Úndistan, Qazaqstan, Qyrǵyzstan, Tájikstan, Ózbekstan densaýlyq saqtaý ministrleri, sondai-aq Pákistan premer-ministriniń arnaiy kómekshisi, QHR Memlekettik densaýlyq saqtaý komitetiniń basshysy ShYU múshe-memleketterindegi qazirgi jaǵdai týraly baiandama jasady.
