Máskeýde Syrtqy ister ministrleriniń keńesiniń (SIMK) otyrysy barysynda ShYU taraptary syrtqy saiasi yntymaqtastyqty odan ári tereńdetý jáne damytý jónindegi birinshi kezektegi mindetterdi qarastyrdy, dep habarlaidy QazAqparat.
Qazaqstandyq taraptan sharaǵa Qazaqstan Respýblikasynyń Syrtqy ister ministri Muhtar Tileýberdi qatysty.
ShYU SIMK otyrysynyń qorytyndysy boiynsha ótken baspasóz konferentsiiasynda Resei SIM basshysy Sergei Lavrov taraptar ShYU-ǵa múshe memleketterdiń aldaǵy sammitine qujattardy daiyndaý barysyn talqylaǵanyn, sondai-aq halyqaralyq jáne óńirlik kún tártibindegi birqatar ózekti máseleler boiynsha keńes ótkizgenin habarlady.
«Biz qosymsha qadamdardy qajet etetin yntymaqtastyq baǵyttaryn qarastyrdyq. Olardyń qatarynda halyqaralyq terrorizmge, esirtkiniń zańsyz ainalymyna, transshekaralyq uiymdasqan qylmysqa jáne kiberqylmysqa qarsy kúreste kúsh-jigerdi biriktirý máseleleri bar. Barlyq osy baǵyt boiynsha memleket basshylarynyń bekitýine usynylatyn ótinishter men basqa da qujattardyń jobalary maquldandy», - dep atap ótti ol.
S.Lavrov sondai-aq Aýǵanstan boiynsha, Siriia máselesin retteý boiynsha, Taiaý Shyǵys pen Afrikanyń soltústigindegi birqatar máseleler boiynsha taraptar pikir almasqanyn aitty.
«Bizde AQSh-tyń Irannyń iadrolyq baǵdarlamasyn retteý jónindegi birlesken keshendi is-qimyl josparynan shyǵýy tóńireginde qalyptasqan jaǵdai boiynsha ortaq ustanym bar», - dep atap ótti S.Lavrov.
Sondai-aq, taraptar ShYU-nyń 2035 jylǵa deiingi kópjaqty ekonomikalyq damý baǵdarlamasyn iske asyrýdaǵy mańyzyn atap ótti. Ózara kóliktik bailanys, ózara eseptesýde ulttyq valiýtalarǵa kóshý, saýda men investitsiia úshin ashyq jaǵdai jasaý máseleleri qaraldy.
Resei SIM basshysy ShYU-ǵa múshe memleketter basshylarynyń qatysýymen ótetin sammit osy jyldyń qarasha aiynda beinekonferentsiia formatynda ótetinin habarlady. Osydan keiin uiymǵa tóraǵalyq etý Tájikstanǵa ótedi.
