Shymkent qalasyndaǵy «Naýryz Plastik» saýda belgisiniń ónimderi endi shetel naryǵynda saýdalanbaq. Jergilikti naryqta birneshe jyl buryn paida bolǵan bul kásiporyn ónimderi sońǵy ýaqytta keń suranysqa ie bolǵan. Búginde zaýyt oiynshyq kóliktiń 10 túri men qurastyrǵyshtyń 5 túrin shyǵarady. Ónimniń ár bólshegi jeke-jeke daiyndalyp, sońynan qurastyrýǵa jiberiledi.
«Qazaqstanda jasalǵan» taýar belgisi bar oiynshyqtar Shymkent qalasynyń bazarlary men oblysymyzdyń barlyq aýdandarynda satylýda. Óndirýshilerdiń aitýynsha, baǵasy qytailyq oiynshyqtardan eki ese arzan. Kásipkerler bul oiynshyqtar barlyq halyqaralyq ekologiialyq talaptarǵa sai keledi deidi. Plastmassasy – sapaly, ýly emes. Sondyqtan, oiynshyqtar bala densaýlyǵy úshin qaýipti emes dep sendiredi óndirýshiler.
Kásipkerler eki óndiristik júieni satyp alýǵa qarjyny «Biznestiń jol kartasy – 2020» baǵdarlamasy aiasynda alǵan. Kásiporynnyń óndiris qýaty aiyna úsh myń ónimnen asady. Degenmen, óndiris kólemin 10 myń danaǵa deiin kóbeitý múmkindigi bar.
Qazirgi tańda kásiporyn óndirisi tolyǵymen jolǵa qoiylǵan. Jaqynda kásipkerler indýstrialdy aimaqtaǵy jańa ǵimaratqa kóshti. Endi óndiris qýatyn arttyryp, taiaý jáne alys shetel naryǵyna shyǵýdy josparlap otyr.
OQO ákiminiń baspasóz qyzmeti
