Ońtústik Qazaqstan oblysynan «Dostyq kerýeni» Ózbekstan Respýblikasyna jolǵa shyqty. Bul issapar Ózbekstan Respýblikasy Prezidenti Shavkat Mirziioevtiń naýryz aiynda Qazaqstanǵa jasaǵan resmi sapary kezinde Qazaqstan halqy Assambleiasy men Ózbekstan Respýblikasy Internatsionaldyq mádeni ortalyǵynyń arasyndaǵy yntymaqtastyq týraly memorandým aiasynda iske asyrylyp otyr.
Memorandýmda qoǵamdyq-saiasi, mádeni-bilim berý, ǵylymi jáne aqparattyq salalardaǵy yntymaqtastyq, eki el halyqtarynyń jaqyndasýyna, halyqtyq diplomatiianyń nyǵaiýy men damýyna yqpal etetin birlesken jobalar men is-sharalardy ázirleý jáne iske asyrý josparlanǵan bolatyn.
«Qazaqstan halqy Assambleiasy» ǵimaraty aldynan jolǵa shyqqan kerýendi shyǵaryp salý rásiminde oblystyq «Qoǵamdyq kelisim» MKK basshysy Erbol Baiqonaqov, Túrkistan qalalyq aqsaqaldar alqasynyń tóraǵasy Jarylqasyn Áziretbergenov, oblystyq ózbek etnomádeni birlestiginiń tóraǵasy, oblystyq máslihattyń depýtaty Badriddin Nishankýlov sóz sóilep, bul shara Elbasynyń «Bolashaqqa baǵdar: rýhani jańǵyrý» atty maqalasyna qoldaý ári, eki baýyrlas elder arasyndaǵy dostyq qarym-qatynasty nyǵaitý maqsatynda uiymdastyrylyp otyrǵanyn aitty.
Ózbekstanǵa bet alǵan 50 aqsaqal 2-6 mamyr aralyǵynda Tashkenttegi Tóle bi babamyzdyń mazaratyna ziiarat etip, ári qarai Samarqandtaǵy Ámir Temir jáne Jalańtós bahadúrdiń, Buharadaǵy Bahaýddin Nakshbandidiń kesenesimen tanyspaq.
Sonymen qatar, «Dostyq kerýeniniń» músheleri Ózbekstan Respýblikasy Internatsionaldyq mádeni ortalyǵynda, Ózbekstandaǵy qazaq mádeni ortalyǵynda jáne ózge de tarihi-mádeni ortalyqtarynda bolyp, sol eldiń azamattarymen kezdesýler josparlanýda.
