Áleýmettik jelilerge Shymkenttegi mektepterdiń birine bosqyndar ornalastyrylady degen aqparat taraǵan bolatyn. Alaida bul aqparatty qalalyq ákimdiktiń baspasóz qyzmeti joqqa shyǵardy, dep habarlaidy "Ult aqparat".
Qalalyq ákimdiktiń baspasóz hatshysy Beken Qonystyń aitýynsha, mektepterdiń birinde jańa oqý jylyna daiyndyq jumystary júrgizilgen.
«Aýǵanstan bosqyndaryn qabyldaidy degen aqparat shyndyqqa sáikes kelmeidi. Toǵys turǵyn alabyndaǵy N120 mektepte jańa oqý jylyna bailanysty josparly jumystar atqarylýda», deidi ol.
Jeksenbide "Taliban" (Qazaqstanda, taǵy birqatar elde terrorlyq uiym dep tanylǵan) Aýǵanstan astanasy Kabýldy soǵyssyz basyp alyp, prezident saraiyna kirdi. Aýǵanstan prezidenti Ashraf Ǵani eldi tastap ketti. Qazir tálipter elge baqylaý ornatqan.
16 tamyzda júzdegen adam elden ketý úshin áýejai qorshaýyn buzyp kirip, ushaqqa minýge tyrysty.
Biyl AQSh 20 jyldan soń Aýǵanstandaǵy áskerin ákete bastaǵan. Osydan soń "Taliban" sodyrlary basqynshylyǵyn kúsheitip, eldi birneshe aidyń ishinde basyp aldy. Vashington AQSh áskerine kómektesken 9 myńdai aýǵandy elden shyǵarýdy josparlaidy.
AQSh tálipter amerikalyq áskerilerge kómek kórsetken aýǵandarǵa kek qaitarady dep qaýiptenedi. Vashington óz áskerine kómektesken aýǵandardy ýaqytsha ornalastyrý úshin Ortalyq Aziia elderine qaiyrylǵany habarlanǵan.
Shariǵat zańdaryna súienetin tálipter urlyq jasaǵandardyń qolyn kesip, adam óltirdi dep kúdikke ilingenderdi, jubaiynyń kózine shóp saldy dep aiyptalǵandardy eshqandai sotsyz jurttyń kózinshe ólim jazasyna kesedi. Budan bólek, er adamdardy saqal ósirýge, áielderdi býrka kiiýge mindetteidi.
"Taliban" teledidar kórýdi, mýzyka tyńdaýdy, kinoteatrlarǵa barýǵa tyiym salyp, 10 jastan asqan qyzdardyń mektepke barýyna shekteý qoiady.
