Shymkenttiń sadaq atý kesheninde Keńes odaǵynyń batyry Qarsybai Spataevty eske alýǵa arnalǵan 42-shi halyqaralyq týrnir bastaldy. Dástúrli saiysqa elmizden jáne kórshiles Ózbekstannan 150-ge tarta sportshy qatysyp jatyr, dep habarlaidy QazAqparat tilshisi.
Biyl batyrdyń týǵanyna 100 jyl tolady. Osyǵan orai respýblika kóleminde aýqymdy sharalar ótkizilip jatyr. Al, Shymkentte bastaý alǵan saiystyń ashylý rásimine batyrdyń shóbere qyzy Qundyz Atash pen Shymkent qalasyndaǵy Qarsybai Spataev atyndaǵy litsei mektebiniń direktory Orynkúl Alshynbekova qatysty. Oblystyq dene shynyqtyrý jáne sport basqarmasy basshysynyń orynbasary Aitmuhamedáli Berdashov pen Oblystyq keshendi joǵary sport sheberligi mektebi direktorynyń orynbasary Senbek Sariev sport dodasynyń ashylý saltanatynda sóz sóilep, sportshylarǵa sáttilik tiledi.
«Osy týrnir elimizge tanymal sportshylardy shyǵaryp jatyr. Atap aitsaq, kezinde Ábdiraiymov, Li Aleksandr degen sportshylarymyz shyqty. Týrnir talai tarlanǵa úlken sportta baspaldaq ispetti. Ońtústiktiń sańlaq sportshysy Lýiza Saidieva osy synda ysylǵan. Jerlesimiz iri jarystarda shashasyna shań jýytpai, aqyry Rio tórinen bir-aq shyqty. Sóitip, úzdik on bes sportshynynyń qataryna endi. Sondai-aq, taǵy surmergen eki jerlesimiz Meksikada ótip jatqan álem chempionatynda baq synaýda», - dedi Oblystyq keshendi joǵary sport sheberligi mektebi direktorynyń orynbasary Senbek Sariev.
Búgin sportshylar olimpiadalyq baǵdarlama boiynsha irikteý saiystaryn ótti. Óz kezeginde halyqaralyq dárejedegi sport sheberi Lýiza Saidieva upai jinaý boiynsha top bastady.
«Qarsybai Sypataev atyndaǵy jarys jyl saiyn ótedi. Bul jarysta biz barymyzdy salamyz. Shet elde ondyqqa ený úshin osy jarysta joǵary nátije kórsetý kerek. Bul jarystan soń jumystar kóp. Aziia oiyndary aldynda Tailandta oqý jattyǵý jiyndary ótedi. Al, bul jarystan barymdy salyp birinshi oryndy alsam deimin», - deidi halyqaralyq dárejedegi sport sheberi Lýiza Saidieva.
