Keshe túnde aýrýhanaǵa túsken Shymkent qalalyq politsiia departamentiniń baspasóz hatshysy Móldir Bekeeva áli esin jimady, dep habarlaidy QazAqparat.
Áleýmettik jelide jazba qaldyrǵan Shymkent qalalyq politsiia departamentiniń baspasóz hatshysy Móldir Bekeeva óz-ózine qol jumsamaq bolǵan.
«Men syndym... Sabyrym taýsyldy...» dep bastalatyn mátinde ol basshylyq tarapynan qysymǵa túskenin aitqan.
Keshe túnde jedel járdemmen aýrýhanaǵa jetkizilgen ol jansaqtaý bólimine jatqyzylǵan. Dárigerler naýqastyń áli esin jimaǵanyn aityp otyr.
«6 sáýir túngi saǵat 01:30-da T.Orynbaev atyndaǵy giperbariialyq oksigenatsiia ortalyǵyna jedel járdem qyzmetimen 1991 jylǵy patsient aýyr jaǵdaida jetkizilgen. Patsientti dárigerler shuǵyl túrde tekserip, jansaqtaý bólimine jatqyzdy. Túsken kezdegi jaǵdaiy aýyr, komanyń I-dárejesi. Qazir naýqas reanimatsiiada em qabyldaýda. Jaǵdaiy turaqty aýyr. Aldyn ala boljam boiynsha patsient sýitsid jasaý maqsatynda kóp mólsherde dári ishken bolýy múmkin», - dedi qalalyq densaýlyq saqtaý basqarmasynyń baspasóz hatshysy Laýra Naqypqyzy.
Al, atalǵan jait boiynsha Shymkent qalalyq politsiia departamentiniń ózindik qaýipsizdik basqarmasy Qarataý APB QR QK 105-baby boiynsha sotqa deiingi tergeý amaldaryn bastaǵandyǵyn málimdedi.
Aita keteiik, osydan birshama ýaqyt aldyn Shymkent qalasy politsiia departamenti baspasóz qyzmetiniń jetekshisi Móldir Bekeeva dep kórsetilgen aýdiojazba áleýmettik jelide tarap, talqyǵa túsken bolatyn.
Onda áiel adamnyń qyzmetkerine jekip sóilep, bylapyt sózder aitqanyn estýge bolady.
Tipti jumystan bosatý jóninde másele qaraityndyǵyn jetkizgen daýys iesi ádep normalaryn saqtamai, aýzyna kelgen aǵat sózderdi qarsha boratqan.
