Foto: DSM baspasóz qyzmeti
Shymkenttegi Shyǵys shaǵynaýdanyndaǵy páterden bir otbasynyń úsh múshesiniń máiiti tabyldy. Qalalyq Tótenshe jaǵdailar departamenti bul oqiǵany rastady, dep habarlaidy Otyrar.kz.
Marqumnyń kórshileri jedel járdem qyzmetine qońyraý shalǵan.
"8 aqpanda saǵat 16:36-da 112 jedel járdem qyzmetine páter turǵyndarynyń qońyraýǵa uzaq ýaqyt boiy jaýap bermegeni jáne esikti ashpaǵany týraly habarlama keldi. Oqiǵa ornyna qutqarý toby jiberildi. Esikti buzyp ashqannan keiin qutqarýshylar páterden úsh adamnyń denesin tapty. Tiisti qyzmetter shaqyryldy", — dep habarlady Tótenshe jaǵdailar departamenti.
Qazirgi ýaqytta oqiǵanyń barlyq mán-jaiy tekserilip jatyr. Aldyn ala aqparat boiynsha, qaiǵyly oqiǵa tabiǵi gazdan ýlanýdan bolýy múmkin. Tergeý amaldary júrgizilip jatyr.
