Foto: ashyq derekkóz
Shymkentte qarjy piramidasyn uiymdastyrǵan “Nazira Gold” kompaniiasyna qatysy bar 9 adamǵa úkim shyqty, dep habarlaidy Ult.kz Qazaqstan.tv arnasyna silteme jasap.
Tergeý derekterine súiensek, olar áleýmettik jeliler arqyly azamattardy aldap, 16 milliard teńgeden astam qarajat jinaǵan.
Uiym ózin altyn buiymdar satýmen ainalysatyn kásip retinde kórsetip, salymshylarǵa salǵan aqshasyn 5 aida eki eselep qaitaramyz dep ýáde bergen. Alaida jinalǵan qarjynyń 14 milliardy iz-túzsiz joǵalyp, qalǵan bóligine aiyptalýshylar týystarynyń atyna záýlim úiler men qymbat kólikter rásimdegen. Bul múlikter endi tárkilenip, jábirlenýshilerge qaitarylady.
Sot sheshimimen uiymnyń jetekshisi 10 jylǵa bas bostandyǵynan aiyryldy. Onyń seriktesteriniń jeteýi 5 jylǵa sottaldy, al bir adamǵa bas bostandyǵyn shekteý jazasy taǵaiyndaldy.
Shymkent qalasynyń qylmystyq ister jónindegi aýdanaralyq sotynyń sýdiasy Madiiar Abdrasilovtyń aitýynsha, “Nazira Gold” jobasynyń bastapqy maqsaty azamattardyń aqshasyn tartý bolǵan:
«2025 jyldyń mamyr aiynda “Nazira Gold” jobasyn qurǵan kezdegi basty maqsat – halyqtyń qarajatyn tartý. Olar ai saiyn 20-41 paiyz tabys, al bes aidan keiin salym somasyn tolyq qaitaramyz dep kórineý oryndalmaityn ýáde bergen», – dedi sýdia.
Sot “Nazira Gold”-tyń áreketin qarjy piramidasyn uiymdastyrý jáne alaiaqtyq dep tanydy.
