Shymkentte jaqynda egilgen gúlderdi qar basyp qaldy, - dep habarlaidy Massaget.kz portaly KTK arnasyna silteme jasap.
Mamandar oiynsha, Shymkentte qysta otyrǵyzylǵan raýshan gúlderi men hrizantemalar kóktemge deiin óspeidi.
"Men biolog retinde, buǵan qaiǵy jutyp turmyn. Ósimdikke obal boldy. Ony azdap qazyp, tamyryn muqiiat alǵym keldi. Biraq jasai almadym, óitkeni muz qatyp qalǵan, tamyry jerde qaldy", - dedi biologiia ǵylymdarynyń kandidaty Roza Jumabaeva.
Mamandardyń aitýynsha, mundai jylýdy unatatyn gúlderdi qys mezgilinde otyrǵyzý qaýipti, sondyqtan kommýnaldyq qyzmetter kóktemdi kútýi kerek edi. Raýshan men hrizantemany qutqarýǵa áli de múmkindik bar. Eger olardy jaýyp qoisa, onda bir bóligi ónip ketýi múmkin. Biraq yqtimaldyǵy tómen.
Aita keteiik, Shymkentte buǵan deiin ondaǵan gúlzarǵa gúl otyrǵyzylǵan. Bir ǵana Qarataý aýdanynda buǵan 17 million teńge jumsalǵan.
Bul rette ákimdik budan esh kemshilik kórip otyrǵan joq. Olar gúlzarlarǵa merdiger jaýapty ekenin aitty. Kóktemde gúlder ónbei qalsa, olar bárin qaitadan otyrǵyzady, biraq óz esebinen.
"Ońtústik óńir bolǵandyqtan kún jyly, qatty sýytpaidy. Sondyqtan kúzde, tipti qarashada da otyrǵyzady. Qazir gúlder qýrap qalǵan bolyp kóringenimen, bul kópjyldyq ósimdikter. Merdiger tarapynan jumysqa kepildik bar. Sondyqtan qansha gúl ólse, kóktemde sonsha gúl tolyqtyrylady", - dedi Qarataý aýdany ákimi apparatynyń bas mamany Esimhan Júzbaev.
