Shymkentte qoǵam qairatkeri Asanbai Asqarovty eske alý jiyny ótti. Shym shahardyń kórkeiip, damýyna zor úles qosqan tulǵany úzeńgiles áriptesteri eske alyp, onyń eskertkishine gúl shoqtaryn qoidy, dep habarlaidy QazAqparat tilshisi.
Qyrkúiektiń 15-i kúni týǵan Asanbai Asqarov kózi tiri bolǵanda biyl 95 jasqa tolar edi. Bul kúni ardaqty azamatpen birge qyzmettes bolǵan el aǵalary onyń esimimen atalatyn kóshe boiyndaǵy eskertkishtiń aldyna jinalyp, miting ótkizdi. Onda sóz alǵan oblystyq ishki saiasat basqarmasynyń basshysy Bolat Tólegen oblystaǵy Asanbai Asqarovtyń qoltańbasy sanalatyn nysandar men jobalardyń búginde igiligin halyq kórip otyrǵanyn tilge tiek ete kele, tarihta esimi qalǵan mundai azamattardy el esinen shyǵarmaitynyn aitty.
Dara tulǵanyń úzeńgiles dostary da atpal azamat jaiynda estelikter aityp, onyń mol murasyn jinaqtap kitap etip shyǵarý isi qolǵa alynyp otyrǵanyn atap ótti. Sondai-aq bes jyldan soń bolatyn 100 jyldyq toiǵa daiyndyqty osy bastan qolǵa alý kerektigine toqtaldy.
Aita keteiik, qairatker Sotsialistik Eńbek Eri, talai jyl Jambyl, Almaty, Ońtústik Qazaqstan oblystary partiia komitetiniń birinshi hatshysy bolyp jemisti eńbek etken azamat. Ásirese, Ońtústik óńirin basqarǵan shaqta Shymkent qalasynyń kórkeiip, damýyna zor úles qosqanyn jurtshylyq jaqsy biledi. Qalanyń ortalyǵyndaǵy Dendrosaiabaqtyń, zoobaqtyń sondai-aq taǵy da birqatar nysandardyń salynýyna da kóp eńbek etken. Sekseninshi jyldardyń sońynda oǵan «Jeltoqsan kóterilisin uiymdastyrýǵa qatysty», «ultshyl» degen aiyptar taǵylyp, biraz ýaqyt qamaýda boldy. Alaida ýaqyt óte kele shyndyqtyń beti ashylyp, qazirgi tańda qairatkerge zor qurmet kórsetilip keledi.
