Shymkent politseileri qaladaǵy kóppáterli úilerdiń biriniń kireberisinde áieldi zorlamaqshy bolǵan kúdiktini ustady. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy QazAqparat tilshisi.
«Politsiia qyzmetkerleri kúdiktiniń aty-jónin anyqtaý men ustaý úshin birqatar shara jasady. Sonyń nátijesinde keshe kúdikti ustaldy. Ol 1985 jyly týǵan jergilikti turǵyn bolyp shyqty. Odan bólek, tergeý amaldaryn júrgizý barysynda kúdiktiniń jábirlenýshiniń qaltasynan 8000 teńgege jýyq aqsha urlaǵany anyqtaldy. Ol óz kinásin tolyq moiyndady», - dedi Nurdildá Oraz ministrlikte ótken onlain brifingte.
Qazirgi ýaqytta kúdikti Shymkent qalasy Politsiia departamentiniń ýaqytsha ustaý abaqtysyna qamaýly.
«Atalǵan jaittar boiynsha Qylmystyq kodekstiń 191-babynyń ekinshi bóliginde jáne 120-babynyń birinshi bóliginde kózdelgen, tonaý jáne zorlaýǵa oqtalý boiynsha sotqa deiingi tergep-tekserý amaldary júrip jatyr. Qylmystyq áreketteri dáleldense, segiz jylǵa deiin bas bostandyǵynan aiyrý jazasy kózdelgen. Tergeý amaldary jalǵasýda», - deidi N. Oraz.
Resmi ókildiń aitýynsha, ótken aptada jalpy sany 2921 qylmys tirkeldi. Politseilerdiń jedel áreket etýi nátijesinde 1938 qylmys izi sýymai ashyldy. Onyń ishinde 5 adam óltirý, 34 tonaý men qaraqshylyq, 501 urlyq faktileri áshkere boldy.
