Shymkentte qala kúni merekesi apta boiy atalyp ótpek. Bul týraly qala ákiminiń orynbasary Qairat Nurtai jergilikti BAQ ókilderine arnalǵan brifingte málim etti, dep habarlaidy QazAqparat tilshisi.
Qairat Nurtaidyń aitýynsha, qalalyq mádeniet bólimi 23-30 qyrkúiek kúnderine arnalǵan merekelik baǵdarlamany uiymdastyryp qoiǵan.
«Biylǵy qala kúni merekesi Elbasynyń «Bolashaqqa baǵdar: rýhani jańǵyrý» atty maqalasymen úndes atalyp ótpek. Merekelik baǵdarlama 23 qyrkúiek, iaǵni, senbi kúni arnaiy jalpyqalalyq senbilikten bastaý alady. Keń aýqymdy mádeni, sporttyq sharalar kópshiliktiń kóńilinen shyǵýy tiis», - deidi Qairat Yrzaqululy.
Al merekeni qorytyndylaityn gala-kontsertke Qairat Nurtas, Qydyráli men Qaraqat, Erke Esmahan, Beibit Kýshkaliev, Abai Begei syndy Qazaqstan estradasynyń ánshileri men "Format" jáne "MBAND" toptary qatysady dep kútilýde.
Aita keteiik, merekede «Jastar» ortalyǵynyń alańynda «Shymkent Arbaty» qolóner buiymdarynyń jármeńkesin, «Táýelsizdik» saiabaǵyndaǵy bas qaqpa - Naýryz alańynda turǵyndardyń qatysýymen velomarafon, ortalyq saiabaqta ardagerler men 11-14 jas aralyǵyndaǵy jasóspirimder arasynda shahmattan týrnir, jańa kitaphana ǵimaratynyń ashylý saltanatyn, 6-20 jas aralyǵyndaǵy jastar arasynda kishi fýtboldan jarys, «Otbasy alleiasynda» jas otbasyn qurǵan azamattarǵa arnalǵan merekelik baǵdarlama ótkizý jáne oqýshylar saraiynda «Taza qala» aktsiiasyn qorytyndylaý josparlanyp otyr.
Sonymen qatar «Shyraily Shymkent» BAQ ókilderi arasyndaǵy baiqaýdyń jeńimpazdaryn marapattaý rásimi men qala ákiminiń osy kúni týylǵan «Eń jas» jáne «Eń qart» azamatyn quttyqtaýy, qaiyrymdylyq aktsiia men kóńildi tapqyrlar komandalary arasyndaǵy oiyndar, aýyl sharýashylyq ónimderiniń jármeńkesi men saiabaqtarda kópshilik serýender, ortalyq ippodromda ulttyq sport oiyndary men Ál-Farabi alańynda «Súiikti Shymqalam» karnaval sherý, «Jastar resýrstyq ortalyǵynda» talantty balalar men jastar arasynda bi, vokal janry boiynsha baiqaý men Qazaq handyǵynyń 550 jyldyǵy monýmentinde kontserttik baǵdarlama bolady dep kútilýde. Budan ózge dendrosaiabaqta «Bolashaq Shymkent» jastar forýmy men «Jailaýkól» demalys aýmaǵynda sporttyq oiyn túrlerinen jarystar, Naýryz alańynda teatrlandyrylǵan kórinis uiymdastyrylmaqshy.
