Shymkentte belgili sazger Israil Saparbai ánderinen "Erkindigim-Eldigim" respýblikalyq ən baiqaýy ótýde. Oǵan elimizdiń Almaty, Qyzylorda, Atyraý, Shyǵys Qazaqstan oblystarynan jáne Ońtústik Qazaqstan oblysynyń aýdan, qalalarynan 45 úmitker qatysyp otyr, dep habarlaidy QazAqparat tilshisi.
Memleket basshysy N.Nazarbaevtyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasyn júzege asyrý maqsatynda aqyn-sazger, dramatýrg Israil Saparbaidyń 75 jasqa tolý mereitoiyna arnalǵan «Erkindigim - eldigim» respýblikalyq án baiqaýy ótkizilip jatyr.
Aitýly sharany ótkizýge Mádeniet jáne sport ministrligi men oblys ákimdigi jáne oblystyq mádeniet basqarmasy muryndyq boldy. Sazgerdiń shyǵarmashylyǵyn keńinen nasihattaý men dáripteý, sondai-aq onyń ánderi arqyly eldiń rýhyn biiktetý maqsatynda uiymdastyrylǵan baiqaýǵa qatysýǵa respýblikanyń birneshe oblystarynan jas ánshiler keldi.
Qazaq estradasynyń daryn ielerin anyqtaý jáne olardyń oryndaý sheberlikterin arttyra otyryp, jeke shyǵarmashyl tulǵalardyń qalyptasýyna yqpal etý baǵytynda ótip jatǵan óner saiysynda 45 úmitker ótinish bildirip, 18 úmitker ekinshi kezeńge joldama aldy.
Úsh kezeńnen turatyn baiqaýdyń sharttary men talaptaryna sáikes, 18-35 jas aralyǵyndaǵy jeke ánshiler nemese toptyq qatysýshylar óz tańdaýy boiynsha azamattyq-patriottyq, balalar ánderi, mahabbat lirikasy, romans syndy túrli janrdaǵy tek avtordyń óz ánderin folklorlyq nemese estradalyq baǵytta tabiǵi daýysta oryndaýy tiis.
Olardyń óneri men oryndaýshylyq qabiletin kompozitor, QR eńbek sińirgen qairatkeri, «Qurmet» jáne «Parasat» ordenderiniń iegeri Keńes Dúisekeev jáne ánshi, QR eńbek sińirgen artisi Sembek Jumaǵaliev syndy óner maitalmandary qazylyq etýde. Jeńimpazdar 6 qazan kúni Shymkent qalasyndaǵy «Túrkistan» saraiynda ótetin gala-kontsertte marapattalady dep josparlanyp otyr.
Gala-kontsertte sonymen qatar Sembek Jumaǵaliev, Ábiirbek Tinaliev jáne Shahizada syndy qazaq estradasynyń ánshileri óner kórsetedi dep kútilýde. Aita keteiik, Israil Saparbai 160-tan asa ánder men 150-ge tarta án mátinderiniń avtory. Táýelsiz «Platinaly Tarlan» syilyǵynyń jáne memlekettik «Parasat» ordeniniń iegeri, Ońtústik Qazaqstan oblysynyń, Shymkent qalasynyń Qurmetti azamaty.
